Kryeministri i Maqedonisë së Veriut, Dimitar Kovaçevski akuzoi partinë opozitare VMRO-DPMNE, për mosplotësimin e objektivit të qeverisë së tij për hapjen e kapitujve të radhës në bisedimet për anëtarësim me Bashkimin Evropian dhe për mungesën e konferencës ndërqeveritare me BE-në. 

Duke folur nga Brukseli në një konferencë shtypi, Kovaçevski tha se partitë anti-NATO, anti-BE dhe pro-ruse në vendin e tij bllokuan rrugën e integrimit. “Si qeveri, punojmë fort që ta realizojmë qëllimin strategjik për anëtarësim në BE deri në vitin 2030. Por, u konfirmua se frenuesi i vetëm i shtetit është koalicioni anti-BE, anti-NATO dhe prorus, ai i VMRO-DPMNE-së dhe partisë E Majta”- tha ai. 

Ndërkohë, VMRO-ja i quajti “fushatë të errët” komentet e kryeministrit dhe të Partisë Lidhja Social Demokrate. “Ky pushtet i LSDM-së dhe BDI-së është zhytyr në kriminalitet dhe ata janë thelbi i të gjitha problemeve”, u tha gazetarëve Marija Mitevska, zëdhënëse e VMRO-së. Bashkimi Europian kishte rikonfirmuar edhe një ditë më parë vendimin se pa ndryshimet kushtetuese, nuk do të mbahej konferenca e dytë ndërqeveritare me Maqedoninë e Veriut.
 
Gazetar Artur Mata

/ rtsh.al /