Për herë të parë, një studim ka renditur efektet anësore të antidepresantëve më të përdorur, duke zbuluar ndryshime të mëdha midis ilaçeve të ndryshme dhe ndikimin që ato mund të kenë në shëndetin fizik të pacientëve.

Studiuesit nga King’s College London dhe Universiteti i Oksfordit analizuan 151 studime që përfshinin mbi 58,500 pacientë dhe 30 lloje të ndryshme antidepresantësh. Studimi, i botuar në revistën mjekësore Lancet, vëzhgoi ndikimin e barnave në tetë javët e para të trajtimit.

“Është e qartë se asnjë ilaç kundër depresionit nuk është ndërtuar njësoj”, tha Dr. Atheeshaan Arumuham nga King’s College London. Sipas tij, këto dallime, edhe nëse duken modeste, mund të kenë ndikim të rëndësishëm klinik, sidomos kur merren për periudha të gjata.

Aktualisht, rreth tetë milionë njerëz në Mbretërinë e Bashkuar marrin ilaçe kundër depresionit. Studiuesit paralajmërojnë se hendeku në efektet anësore mund të ndikojë në aftësinë e pacientëve për t’u përmbajtur ndaj trajtimit dhe në shëndetin e tyre afatgjatë.

“Shumica e studimeve ishin afatshkurtra vetëm tetë javë dhe brenda kësaj kohe pamë ndryshime të mëdha në shëndetin fizik, që janë klinikisht të rëndësishme”, tha Dr. Toby Pillinger.

Megjithatë, studiuesit theksojnë se askush nuk duhet të ndërpresë trajtimin pa u konsultuar me mjekun. Përkundrazi, ata bëjnë thirrje që përzgjedhja e antidepresantëve të jetë më e personalizuar, duke marrë parasysh diagnozën dhe gjendjen fizike.

Kujdes! Ky është një artikull informues dhe nuk zëvendëson këshillën e mjekut.

/rtsh.al/