Ministri për Evropën dhe Punët e Jashtme, Ferit Hoxha, zhvilloi sot një bisedë telefonike me homologun e tij kroat, Gordan Grlić-Radman, ku u diskutua mbi marrëdhëniet dypalëshe dhe projektet rajonale në fushën e energjisë dhe sigurisë.

Në një postim në platformën X, Hoxha e cilësoi telefonatën si “të frytshme dhe produktive”, duke theksuar se gjatë saj u rikonfirmuan marrëdhëniet e shkëlqyera dhe partneriteti i fortë strategjik ndërmjet Shqipërisë dhe Kroacisë.

“Telefonata e parë e frytshme dhe produktive me homologun tim kroat, Gordan Grlić-Radman, gjatë së cilës rikonfirmuam marrëdhëniet e shkëlqyera dhe partneritetin e fortë strategjik ndërmjet Shqipërisë  dhe Kroacisë. Theksuam rëndësinë e thellimit të mëtejshëm të bashkëpunimit dypalësh në sektorë kyç, përfshirë ekonominë, energjinë, mbrojtjen dhe turizmin,” shkroi Hoxha.

Ai shtoi se vëmendje e veçantë iu kushtua forcimit të ndërlidhjes dhe sigurisë energjetike përmes projekteve madhore rajonale, si Korridori Adriatiko-Jonian, Gazsjellësi Trans Adriatik dhe zgjerimi i tij me Gazsjellësin Joniano-Adriatik, si dhe mbi Iniciativën e Tre Deteve, të cilat i cilësoi si “shtylla të rëndësishme për rritjen dhe qëndrueshmërinë në Evropën Juglindore”.

Ministri Hoxha bëri të ditur se gjatë bisedës u shkëmbyen pikëpamje mbi sigurinë dhe bashkëpunimin rajonal, duke nënvizuar përgjegjësinë e përbashkët të Shqipërisë dhe Kroacisë si aleatë në NATO për të kontribuar në paqe, stabilitet dhe mbrojtje kolektive.

“Si partnerë të afërt, mbetemi të përkushtuar fort për avancimin e sigurisë, stabilitetit dhe një të ardhmeje të përbashkët evropiane për rajonin,” përfundoi Hoxha në mesazhin e tij.

First useful and productive call with my Croatian counterpart, Gordan Grlić-Radman @grlicradman, reaffirming the excellent relations and strong strategic partnership between #Albania 🇦🇱and #Croatia 🇭🇷

We underscored the importance of further deepening bilateral cooperation… pic.twitter.com/lEYepOcxOJ

— Ferit Hoxha🇦🇱 (@HoxhaFer) March 20, 2026

/rtsh.al/