Durim Bami, një emër i njohur për drejtësinë, pritet të ekstradohet këtë të enjte nga Dubai. Policia e Shtetit ka njoftuar se në kuadër të operacionit të koduar “The Wanted”, Bami do të ekstradohet nga Emiratet e Bashkuara Arabe në Shqipëri.

Bami, i shpallur në kërkim ndërkombëtar, do të përballet me akuzat për vepra të rënda penale, përfshirë “Sigurimi i kushteve dhe mjeteve materiale për të kryer vrasje”, “Grupi i strukturuar kriminal”, “Kultivimi i bimëve narkotike” dhe “Kryerja e veprave penale nga organizata kriminale”.

Durim Bami, 47 vjeç, nga Nikël i Krujës, është një figurë e njohur për drejtësinë shqiptare për lidhjet e tij me grupe kriminale të njohura dhe përfshirjen e tij në atentate të rënda. Ai është dyshuar për një tentativë vrasjeje në vitin 2004 dhe ka pasur lidhje me disa vrasje të dyshimta, përfshirë vrasjen e Erzen H. dhe Hasan K., si dhe për takimin e fundit me Enver Stafukën, i cili është gjithashtu një personazh i njohur i lidhur me krimin.

Bami është gjithashtu i dyshuar për të qenë pjesë e organizatave kriminale që ishin në hetim për tentativë vrasjeje ndaj ish-deputetit Arben Ndoka, për të cilin ai organizoi sigurimin e informacionit dhe koordinimin për vrasjen. Po ashtu, ai ka qenë i përfshirë në aktivitetin e kultivimit të kanabisit në zonat e Niklës dhe Bubqit, dhe akuzohet për pjesëmarrjen në trafikimin e lëndëve narkotike.

Bami ishte shpallur në kërkim dhe ndaj tij u vendos masa “arrest në burg” përfshirë akuzat për veprime penale që lidhen me organizatat kriminale dhe aktivitete të paligjshme, si dhe për veprat e tij lidhur me vrasjet dhe tentativat për vrasje.

/rtsh.al/