Prokuroria e Tiranës ka kërkuar konfiskimin e pasurive të familjarëve të personit me inicialet S.A., i dënuar në Shtetet e Bashkuara të Amerikës me 22 vite burg për vepra penale në fushën e akteve terroriste.

Ai akuzohet se ka siguruar ose tentuar të sigurojë mbështetje materiale për individë apo grupe të përfshirë në aktivitet terrorist, si dhe ka bërë deklarim të rremë për t’u pajisur me pasaportë.

Ai po hetohet edhe në vendin tonë për veprën penale “Pastrimi i produkteve të veprës penale ose veprimtarisë kriminale”.

Nga verifikimet e kryera mbi të dhe familjarët e tij, rezultoi se ata kanë kryer transaksione financiare dhe veprime ekonomike në vlera të larta, të cilat nuk justifikohen me të ardhurat e deklaruara ndër vite. Familjarët e tij, shtetasit Z.A. dhe V.A., kanë pretenduar se të ardhurat i kanë siguruar nga qiratë dhe kursimet, por nuk kanë dokumentacion për të provuar këto deklarata.

Pasuritë e kërkuara për konfiskim:

Llogaritë e shtetasit Z.A. me gjendje Lekë 39.49, USD 4.74, si dhe depozitat në vlerën USD 50,109.56 dhe Lekë 3,862,244.93.

Llogaritë e shtetases V.A. me gjendje EUR 15,001.09.

Llogaritë e përbashkëta të Z.A. dhe V.A. me gjendje Lekë 11,734,250.00.

Njoftimi i plotë i Prokurorisë:

Prokuroria pranë Gjykatës së Shkallës së Parë të Juridiksionit të Përgjithshëm, Tiranë kërkoi konfiskimin e pasurive të familjarëve të shtetasit S.A., i dënuar në Shtetet e Bashkuara të Amerikës me 22 vite burg, për vepra penale në fushën e akteve terroriste, me akuzën se ka siguruar ose ka tentuar të sigurojë mbështetje materiale për individë apo grupe të përfshirë në aktivitet terrorist dhe ka bërë deklarim të rreme për t’u pajisur me pasaportë.

Aktualisht ky shtetas, i njohur ndryshe edhe si A.Q., në Shqipëri po hetohet për veprën penale ‘Pastrimi i produkteve të veprës penale ose veprimtarisë kriminale’ parashikuar nga neni 287 i Kodit Penal, ndërsa hetimet mbi procedimin pasuror nr.8 të vitit 2025, nisën nga informacionet e Drejtorisë për Hetimin e Krimit Ekonomik e Financiar.

Ky shtetas, është i biri i shtetasve Z.A. dhe V.A. Nga verifikimi i bërë në lidhje me të dhe familjarët e tij, rezultoi se ka transaksione financiare në banka shqiptare të nivelit të dytë, apo veprime të tjera ekonomike në vlera të larta ekonomike të cilat nuk mund të justifikohen me të ardhurat e krijuara ndër vite. Këta shtetas deklaruan se të ardhurat i kanë krijuar nga qiratë e kursimet, por nuk kanë dokumente të provojnë këto deklarata dhe vlerat monetare objekt kërkese për konfiskim nuk kanë prejardhje të ligjshme si dhe faktin që këto pasuri nuk justifikohet me të ardhura të ligjshme dhe dokumentacion.

Përfundimisht bazuar në hetimin e kryer vlerat monetare të mësipërme nuk justifikohen nga subjekti S.A. dhe pjestarët e tjerë të familjes së tij.

Për këtë arsye Prokuroria pranë Gjykatës së Shkallës së Parë të Juridiksionit të Përgjithshëm, Tiran kërkon konfiskimin dhe kalimi në pronësi të shtetit të llogarive si më poshtë:

Llogaritë e shtetasit Z.A. me gjendje lekë 39.49, Usd 4.74, si dhe depozitat në vlerën USD 50,109.56 dhe Lekë 3,862,244.93;

Llogaritë e Shtetases V. A. me gjendje Eur 15,001.09; dhe

Llogaritë e shtetasve Z.A. dhe V.A. me gjendje Lek 11,734,250.00.

/rtsh.al/