Ish-kryeministri maqedonas, Nikola Gruevski, prej vitesh në azil për t’i shpëtuar dënimit nga gjykatat vendore, thotë se ai vazhdon të përndiqet sikur të ishte në politikë.

Në një intervistë për “Politika”, Gruevski komentoi temat aktuale dhe mundësinë e rikthimit të tij në atdhe.

Gishti i tij kritik u drejtua nga ish-pasardhësi socialdemokrat, Zoran Zaev.

“Përndjekja ime politike vazhdon me të njëjtin intensitet si në të kaluarën gjashtë apo shtatë vite më parë. Ndikimi më i madh në prokurori, drejtësi, media është Zoran Zaev, i cili është i përkushtuar pa u lodhur për të më persekutuar mua dhe popullin tim si dhe ish-bashkëpunëtorët. Zaev u angazhua me gjyqtarë, prokurorë dhe media, herë duke ushtruar ndikim politik personal, herë financiar, në të njëjtën kohë duke kontrolluar një pjesë të madhe të zyrtarëve dhe deputetëve të LSDM-së,” tha Gruevski.

Sipas ish-kreut të qeverisë, persekutimi politik nuk po dirigjohet nga prokurorët, as gjyqtarët, por nga politikanët rivalë që shfrytëzojnë propagandën mediatike.

Disa politikanë shqiptarë kanë aluduar se më 23 tetor Gruevski do të rikthehet në Maqedoni nga Hungaria, ku qëndron prej arratisjes në vitin 2018.

“Këto deklarata të disa partive shqiptare shqiptare dhe maqedonase të afërta me [Hristijan] Mickoskin [VMRO-DPMNE] dhe Zaevin janë pjesë e folklorit, të cilin folklor e kemi vëzhguar prej rreth një muaji.

Në themel të gjithçkaje qëndron frika e kthimit tim eventual në vend. Në radhë të parë është qëndrimi i disa politikanëve ndaj meje në 5–6 vitet e fundit, mosha, por edhe paaftësia e tyre në menaxhimin e përgjithshëm të shtetit, si dhe motivet kriminalo-korruptive. Kjo është arsyeja pse, në fakt, disa prej tyre merren me politikë,” deklaroi Gruevski për “Politika”. /Zhurnal

Akuzat ndaj ish-kryeministrit Gruevski

Mbi ish-kryeministrin Gruevski rëndon një dënim me burg për rastin “Tanku”, ku ai rezultoi se ushtroi trysni për blerjen e një automjeti luksoz me vlerë 600 mijë euro, dy herë e gjysmë më shtrenjtë sesa fondi i parashikuar nga Ministria e Brendshme e kohës.

Ish-ministrja e dikasterit, Gordana Jankulovska, po vuan dënimin me 4 vite burg për rastin në fjalë.

Ndërkohë që nëntor të 2018-ës, vetë Gruevski u arratis drejt Hungarisë përpara se të burgosej.

Ai shfrytëzoi makinën me targa diplomatike të ambasadës hungareze në Shqipëri për të kaluar në Malin e Zi e më tej drejt Budapestit.

Prej gati dy vitesh ai jeton si mbrohet nga autoritetet hungareze me arsyen se përndiqet politikisht në Maqedoninë e Veriut.

/rtsh.al/