Pushtimi ushtarak i Ukrainës nga Rusia ka prodhuar rezultate krejtësisht të kundërta nga ato që synonte presidenti rus Vladimir Putin, duke sjellë konsolidimin e aleancës euroatlantike në vend të dobësimit të saj. Kjo është shprehur nga ish-presidenti i Polonisë, Aleksander Kwasniewski, gjatë një interviste të dhënë për median gjermane Deutsche Welle (DW).

Sipas Kwasniewski-t, qëllimet e udhëheqësit rus për riatdhesimin e influencës ruse në rajon ishin të dukshme që në fillimet e pushtetit të tij, por përmasat e veprimeve të tij ushtarake rezultuan të jenë një dështim strategjik.

Kwasniewski kujtoi takimet e tij të hershme zyrtare me presidentin rus gjatë periudhës 2000–2005, duke zbuluar prapaskenat e bisedimeve në Kremlin.

“E takova Putinin rreth 20 herë midis viteve 2000 dhe 2005, gjatë mandatit tim të dytë si president, kur ai ishte ende një president i ri. Ai u përgjigj: ‘E dini, unë dua të rivendos madhështinë e Rusisë’. Një ‘Rusi e madhe’, sipas pikëpamjes së Putinit, nuk mund të ekzistojë pa Ukrainën, Bjellorusinë, Kaukazin dhe Azinë Qendrore”, u shpreh ai, duke pranuar se në atë kohë këto deklarata i shihte gabimisht si thjesht ambicie politike të një udhëheqësi të ri.

Lidhur me situatën aktuale të sigurisë dhe raportin e forcave ushtarake, ish-presidenti polak nënvizoi se Rusia nuk i ka kapacitetet për një përplasje direkte me bllokun perëndimor.

“Në vitin 2022, agresioni i Rusisë kundër Ukrainës u bë një gabim historik. Por përballja me NATO-n sot nuk do të ishte më një gabim historik. Do të ishte një gabim mega-historik, sepse NATO është më e fortë se Rusia, dhe kjo është e qartë”, deklaroi Kwasniewski.

Në mbyllje të analizës së tij, ai vuri theksin te kërcënimet jo-konvencionale, duke sqaruar se “ka provokime hibride kundër NATO-s dhe do të vazhdojë të ketë. Qëllimi i tyre është të testojnë se sa të bashkuar janë aleatët, si reagojnë, si marrin vendime dhe nëse janë të fortë apo të dobët”, elemente këto që ai i konsideron si një tjetër rrjedhojë të gabuar të politikës së jashtme të Moskës.

/rtsh.al/