Që prej datës 1 shtator, ka nisur fushata kombëtare e depistimit falas për kontrollin e qafës së mitrës, e cila do të zhvillohet në të gjitha qendrat shëndetësore të vendit.

Të gjitha gratë e lindura nga viti 1975 deri në vitin 1985 mund të paraqiten pranë mjekut të familjes, për të kryer këtë kontroll falas dhe të domosdoshëm për shëndetin e tyre. Kontrolli i hershëm shpëton jetë, pasi ndihmon në zbulimin dhe trajtimin në kohë të sëmundjeve që lidhen me qafën e mitrës, duke parandaluar pasoja serioze për shëndetin e grave.

“Më dha një shenjë që nuk më pëlqeu, vajta për kontroll dhe bëra biopsi ku dola me kancer. Tani jam shumë mirë, e kapa në kohë. U bëj thirrje të gjitha grave që të mos kenë frikë as nga kimiot dhe rrezet dhe të bëjnë kontrollet të shpëtojnë jetën e tyre”, u shpreh një qytetare.

Kjo fushatë synon të rrisë ndërgjegjësimin dhe të nxisë kujdesin e grave për shëndetin e tyre, duke u dhënë mundësinë të përfitojnë nga një shërbim i specializuar pa asnjë kosto.

“Këto depistime janë shumë të rëndësishëm sidomos për moshën tonë që rrisku është më i lartë”, u shpreh një qytetare tjetër.

Burime në Njësinë Vendore të Kujdesit Shëndetësor në Korçë bëjnë me dije se vitin e kaluar, janë realizuar 547 teste, nga të cilat pozitive kanë rezultuar 39 ose thënë ndryshe 7.12%. Për këtë fushatë, janë 600 kite në dispozicion dhe ka nisur tërheqja e tyre nga qendrat shëndetësore.

Gazetare: G. Manushi   

/rtsh.al/