Ministrja e Brendshme në detyrë, Albana Koçiu ka reaguar në rrjetet sociale lidhur me protestën e opozitës që po vijon në Tiranë, ku protestuesit marshuan drejt Drejtorisë së Policisë së Shtetit dhe pati përplasje me forcat e rendit.

Në reagimin e saj, ministrja thekson se përdorimi i molotovëve nuk mund të konsiderohet si akt proteste, por si provokim i hapur dhe tentativë për përshkallëzim të situates.

 “Të shkosh me molotovë në duar drejt godinës së Policisë së Shtetit nuk është një akt proteste, por një provokim i hapur dhe një dëshirë e ethshme për përshkallëzim, duke tentuar të delegjitimohet forca e ligjit përballë presionit të rrugës. Marshojnë si çlirimtarë në rrugët e kryeqytetit, ndërkohë që janë po ata vetë që shqiptarët i kanë lënë jashtë rrugës së politikës me votë. Duke u fshehur pas bandës së molotovëve, ky Don Kishot që grindet me koshat e mbeturinave si me mullinjtë e erës, e ka kthyer partinë e parë pluraliste në një repart zjarrvënësish. Ky zjarr nuk djeg dot asnjë reformë dhe as të ardhmen europiane të Shqipërisë, por vetëm mbetjet e fundit të një opozite që nuk di më as kush është, as ku po shkon dhe as pse po bërtet.”

/rtsh.al/