Kreu i diplomacisë së Maqedonisë së Veriut i kërkon Lavrovit tërheqjen ushtarake ruse nga Ukraina

Maqedonia e Veriut | 3 vite më parë

Në cilësinë e Kryesuesit të OSBE-së, ministri i Punëve të Jashtme të Maqedonisë së Veriut, Bujar Osmani ka zhvilluar një bisedë telefonike me ministrin e Punëve të Jashtme të Federatës Ruse, Sergej Lavrov.

Gjatë bisedës, ministri Osmani ka trajtuar sfidat në rajonin e OSBE-së dhe ritheksoi përkushtimin e Kryesimit të Maqedonisë së Veriut për respektimin e parimeve dhe angazhimeve themelore të OSBE-së.

Në këtë kontekst, ai ka theksuar domosdoshmërinë e ndalimit të agresionit, tërheqjes së forcave ushtarake ruse nga Ukraina, respektimit të sovranitetit dhe integritetit territorial të Ukrainës.

“Gjithashtu, ministrat Osmani dhe Lavrov shkëmbyen mendime edhe për çështjet më aktuale lidhur me funksionimin e OSBE-së”, njofton Ministria e Punëve të Jashtme e Maqedonisë së Veriut.

/rtsh.al/

Të gjitha të drejtat e këtij materiali janë pronë ekskluzive dhe e patjetërsueshme e RTSH, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e RTSH, në të kundërt çdo shkelës do mbajë përgjegjësi sipas nenit 179 të Ligjit 35/2016.

Komentet 0

Ende nuk ka komente. Bëhuni i pari që komenton.