Qeset plastike vazhdojnë të përdoren me të madhe në Maqedoninë e Veriut.

Tregtarët për të mbrojtur ambientin fillimisht respektuan ligjin dhe shisnin qese letre dhe lëndë të tjera. Por kostoja prej 15 ose 30 denarë për një të tillë rëndon buxhetin e qytetarëve dhe kjo masë ka humbur kuptimin e qëllimit fillestar, shkruan Alsat.

Ministria e Ekologjisë paralajmëroi se po ndjekin standardet evropiane dhe se tani e tutje do të prodhohen qese bio të degradueshme.

“Për fat të keq, nuk e di nëse dikush do të bëj profit me këtë situatë. Paguhen me çmim më të lartë sesa vlera që ka ajo qese nëpër shitore. Vlerësoj se kjo është e papranueshme, se të gjithë shohim në çfarë situate ekonomike jemi dhe shumica e njerëzve nuk mund ta përballojnë,” thekson një qytetar.

Ambientalistët thonë se nga ana e shtetit, për të mbrojtur ambientin jetësor dhe për të ulur ndotjen e ajrit, qeset plastike janë të fundit.

Në radhë të parë ndotësit më të mëdhenj janë industritë e rënda, ngrohjet me derivate fosile, siç është rasti i rreth 700 institucioneve publike në Maqedoninë Veriore, automjetet e vjetra pa standarde ekologjike, djegia e deponive dhe ngrohja e shtëpive.

Sipas tyre pagesa e qeseve plastike më tepër është bërë për përfitime materiale të kompanive prodhuese, tregtuese dhe shitësit e tyre privatë./ Alsat

/rtsh.al/