Jemi mësuar të besojmë se ushqimi dhe medikamentet janë të ndara, por shkenca po zbulon se ato shpesh bashkëveprojnë në mënyra të papritura, dhe ndonjëherë të rrezikshme.

Ekspertët theksojnë se shumica e ilaçeve nuk ndikohen nga ushqimi, por disa kombinime janë veçanërisht të rëndësishme për t’u njohur.

Grejpfruti

Është një nga shembujt më të njohur të ndërveprimit me ilaçe. Lëngu i tij mund të pengojë një enzimë kyçe në mëlçi, duke bërë që medikamentet (si statinat për kolesterolin, apo ilaçet për presionin e gjakut) të qëndrojnë më gjatë në trup dhe të arrijnë nivele toksike.

Vitamina K dhe ilaçet antikoagulante

Pacientët që marrin hollues gjaku si varfarina duhet të kenë një dietë të qëndrueshme me perime me gjethe jeshile (të pasura me vitaminë K). Rritja e sasisë së vitaminës K mund të dobësojë efektin e ilaçit.

Produktet e qumështit

Disa antibiotikë, si ciprofloksacina, mund të dobësohen nëse merren me qumësht, kos apo djathë. Molekulat e qumështit lidhen me molekulat e ilaçit në zorrë, duke penguar thithjen e tyre në gjak. Zgjidhja është e thjeshtë: shmangni produktet e qumështit 2-4 orë para dhe pas marrjes së antibiotikut.

Shfrytëzimi i ndërveprimeve për trajtime më të mira

Përballë kësaj ndërlikueshmërie, shkencëtarët po punojnë për të kuptuar më mirë këto ndërveprime. Qëllimi nuk është vetëm parandalimi i efekteve anësore, por edhe shfrytëzimi i tyre për të rritur efikasitetin e trajtimeve. Për shembull, disa studiues po testojnë nëse dietat e caktuara, si ajo ketogjenike, mund t’i bëjnë ilaçet kundër kancerit më efektive.

Ndërkohë, ekspertët theksojnë se është shumë e rëndësishme që pacientët të mos ndërveprojnë me mjekët apo farmacistët. Për të parandaluar rreziqet, duhet t’i kushtoni kujdes udhëzimeve që vijnë me ilaçet dhe t’i diskutoni gjithmonë me mjekun tuaj kombinimet e mundshme të ushqimit me medikamentet.

/rtsh.al/