Vijat e nxirjes dikur ishin diçka që njerëzit përpiqeshin t’i fshehnin me çdo kusht. Por tani, falë ndikimit të mediave sociale, ato janë bërë një trend i ri bukurie, i vlerësuar nga miliona. Influencues të ndryshëm tregojnë se si t’i krijojnë këto vija duke përdorur vetë-nxirës lëkure (self-tanners) dhe shirita maskues, duke i promovuar si një mënyrë të sigurt për të arritur pamjen e dëshiruar të verës pa u ekspozuar në diell.

Ky trend është i ndarë në dy grupe: ata që përdorin produkte kozmetike dhe ata që ende zgjedhin metodën tradicionale – ekspozimin në diell. Megjithatë, kjo zgjedhje e dytë vjen me rreziqe të mëdha, shpesh të shpërfillura.

Djegia nga dielli dhe pasojat shëndetësore

Në TikTok, video me hashtag-e si #sunburntanlines (vijat e djegies nga dielli) dhe #sunpoisoning (helmimi nga dielli) tregojnë njerëz që shfaqin lëkurë të kuqe dhe të rrudhur, duke përfshirë edhe pretendimin se “pa dhimbje nuk ka fitim”. Këto veprime injorojnë faktet shkencore që lidhin rrezatimin ultravjollcë (UV) me kancerin e lëkurës.

Një shembull tronditës është historia e Jak Howells, një 26-vjeçar nga Swansea, i cili ishte i varur nga solariumet. Pavarësisht se lëkura e tij digjej shpesh, ai nuk i merrte seriozisht rreziqet, derisa një nishan i gjakosur në shpinë e çoi në diagnozën e melanomës, një lloj i rrezikshëm i kancerit të lëkurës. Jak iu nënshtrua operacioneve të vështira dhe imunoterapisë, duke iu dhënë vetëm një vit jetë nëse trajtimi nuk funksiononte. Fatmirësisht, ai u shërua, por sot i frikësohet diellit dhe përdor krem mbrojtës SPF çdo ditë.

Fakte dhe dezinformata

Megan Fisher nga Cancer Research UK shpjegon se rritja e rasteve me kancer lëkure lidhet me dëmtimet e shkaktuara nga djegiet e diellit dekada më parë, por një tjetër faktor shqetësues është dezinformata që qarkullon në internet. Dr. Kate McCann, specialiste e shëndetit parandalues, e cilëson këtë situatë si një “stuhi perfekte”, ku trendet e rrezikshme kombinohen me pretendimet e rreme se kremi mbrojtës nga dielli shkakton kancer.

Ajo thekson se, ndërsa disa përbërës të kremrave mund të dëmtojnë mjedisin, nuk ka prova që ato janë të dëmshme për shëndetin e njeriut. Më e rëndësishme se gjithçka është mbrojtja nga dielli. Jaku, i cili e ka përjetuar këtë pasojë në lëkurën e tij, ndan mesazhin e rëndësishëm: “Për një kohë të gjatë e fajësoja veten… ndaj ndoshta tani ndihem sikur e kam bërë dënimin tim.”

Tani, edhe influencueset e bukurisë po e theksojnë rëndësinë e kësaj çështjeje, duke i bërë thirrje audiencës: “Dëmtimi i lëkurës është real.” Ky mesazh synon të orientojë njerëzit drejt metodave të sigurta për të arritur estetikën e dëshiruar, pa rrezikuar shëndetin.

/rtsh.al/