Një 24-vjeçar është vënë në pranga nga policia pasi u kap duke përdorur kartëmonedha të falsifikuara për të blerë karburant. I riu, i identifikuar me inicialet E.K., rezultoi të ishte një person me precedentë në këtë fushë, pasi kërkohej edhe nga Policia e Vlorës.

Operacioni u krye nga Specialistët për Hetimin e Krimeve Ekonomiko-Financiare. Sipas njoftimit zyrtar, më datë 24 janar 2026, 24-vjeçari është paraqitur në një pikë karburanti në rrugën “Egnatia” në kryeqytet. Ai ka tentuar të kryejë pagesën duke përdorur dy kartëmonedha të prerjes 100 dollarë, të cilat dyshohet se janë false. Policia ka sekuestruar menjëherë kartëmonedhat në cilësinë e provës materiale.

Seri mashtrimesh

Nga verifikimet e kryera pas ndalimit, rezultoi se aktiviteti i E.K. nuk ishte i izoluar. Ai ishte shpallur në kërkim nga Policia e Vlorës për dy raste të tjera të shpërndarjes së parave false, të kryera po gjatë muajit janar 2026.

Policia bën me dije se hetimet po vijojnë për të zbardhur raste të tjera ku mund të jetë përfshirë ky shtetas, duke dyshuar se ai mund të ketë hedhur në treg sasi të tjera parash të falsifikuara.

/rtsh.al/