Situata kritike e krijuar nga moti i keq në Shqipëri ka vënë në lëvizje edhe partnerët ndërkombëtarë. Delegacioni i Bashkimit Evropian në Tiranë deklaroi sot se po ndjek me shqetësim situatën e përmbytjeve që kanë prekur disa zona të vendit.

Përtej monitorimit, Brukseli ka nisur asistencën konkrete përmes teknologjisë së avancuar.

Satelitët në ndihmë të emergjencave

Sipas njoftimit zyrtar, Drejtoria e Përgjithshme e BE-së për Mbrojtjen Civile dhe Ndihmën Humanitare (DG ECHO) ka vendosur tashmë kontakte të ngushta me autoritetet shqiptare.

Një ndihmë e çmuar në këto momente është ofrimi i të dhënave nga hapësira. BE konfirmon se po ndan me Shqipërinë informacione dhe pamje të detajuara nga sateliti Copernicus. Këto pamje janë jetike për të hartëzuar saktësisht zonat e përmbytura dhe për të orientuar ndërhyrjet në terren.

Gatishmëria për ndërhyrje

Delegacioni ka bërë të qartë se mbështetja nuk do të kufizohet vetëm në shkëmbim informacioni nëse situata përkeqësohet.

“Së bashku me shtetet anëtare, Bashkimi Evropian është i gatshëm të mbështesë popullin shqiptar për përballimin e kushteve ekstreme atmosferike,” thuhet në deklaratë.

Ky angazhim përfshin mundësinë e aktivizimit të Mekanizmit të Mbrojtjes Civile të BE-së, një instrument që mobilizon ndihma emergjente (mjete, ekipe shpëtimi, pajisje logjistike) nga vendet e BE-së drejt vendeve të prekura nga fatkeqësitë natyrore.

/rtsh.al/