Pesë persona kanë mbetur të dëmtuar pas përplasjes së dy mjeteve lundruese në Liqenin e Komanit.

Ngjarja ka ndodhur rreth orës 15:15, teksa dy varkat, të cilat kryenin itinerarin Koman–Lumi i Shalës, dyshohet se janë përplasur aksidentalisht.

Si pasojë e përplasjes, pesë shtetas kanë pësuar dëmtime, por ndodhen jashtë rrezikut për jetën. Pas ngjarjes, të plagosurit janë transportuar me helikopter drejt Spitalit Rajonal të Shkodrës, ku po marrin ndihmën e nevojshme mjekësore.

Ata po marrin ndihmën mjekësore, ndërsa shtetasit e tjerë që ndodheshin në dy mjetet lundruese nuk kanë pësuar dëmtime.

Pas ngjarjes, të gjithë personat që ndodheshin në varka janë nxjerrë në kalatën e Komanit me ndihmën e mjeteve të tjera lundruese.

Ndërkohë, grupi hetimor po punon për zbardhjen e plotë të rrethanave të aksidentit. Paraprakisht dyshohet se shkak ka qenë shpejtësia e lartë e mjeteve lundruese, në një segment me kthesë dhe fushëpamje të kufizuar.

/rtsh.al/