Princesha Mette-Marit e Norvegjisë, ka shprehur keqardhjen për miqësinë e saj me Jeffrey Epstein, në një përpjekje për të kufizuar ndikimin e një prej skandaleve më të mëdha që ka goditur familjen mbretërore të vendit.

“U manipulova dhe u mashtrova. Sigurisht që do të doja të mos e kisha takuar kurrë . Është jashtëzakonisht e rëndësishme për mua të pranoj se nuk e kam kontrolluar më me kujdes të kaluarën e tij dhe gjithashtu të pranoj se jam manipuluar dhe mashtruar kaq shumë. Ishte një marrëdhënie miqësore: ai ishte para së gjithash miku im. Por nëse pyetja juaj është nëse marrëdhënia ishte e një natyre tjetër, përgjigjja është jo”, tha ajo në një intervistë me transmetuesin publik NRK.

Publikimi nga Departamenti Amerikan i Drejtësisë i miliona dokumenteve që lidhen me aktivitetet e të dënuarit për krime seksuale, Jeffrey Epstein, i cili u gjet i vdekur në qelinë e tij, ka tronditur të gjithë botën, përfshirë Norvegjinë, pasi zbuloi lidhjet e tij me figura publike, përfshirë princeshën dhe politikanë të lartë norvegjezë, drejtues biznesi dhe diplomatë.

Dokumentet zbulojnë komunikim të shpeshtë midis princeshës dhe Epstein, shumë kohë pas pranimit të fajësisë nga ana e tij në vitin 2008 për prostitucion të fëmijëve dhe dënimit të tij nga një gjykatë në Florida.

Princesha 52-vjeçare, e cila i kërkoi falje Mbretit Harald dhe Mbretëreshës Sofia në një deklaratë më 6 shkurt, nuk është akuzuar për ndonjë vepër penale.

Princesha, gruaja e Princit të Kurorës Haakon, mbajti kontakte me Epstein nga viti 2011 deri në vitin 2014 dhe u prit në shtëpinë e tij në Palm Beach për katër ditë gjatë një vizite private në vitin 2013, sipas dokumenteve amerikane.

/rtsh.al/