Downing Street ka njoftuar se disa shërbime të kufizuara qeveritare në Mbretërinë e Bashkuar mund të jenë përkohësisht jashtë funksionit, ndërsa po kryhen punime për sigurinë e sistemeve. Autoritetet theksojnë se asnjë shërbim i madh publik kritik nuk është prekur dhe se po bashkëpunojnë me OpenAI dhe partnerë ndërkombëtarë për trajtimin e problemit. Zëdhënësja e kryeministrisë britanike, e njohur si Nr. 10, deklaroi se institucionet qeveritare kanë ndërmarrë masa për të identifikuar dhe korrigjuar ekspozimet e mundshme në sistemet e tyre, pas një problemi të lidhur me PHP-në.

Autoritetet nuk kanë bërë të ditur se cilat shërbime specifike mund të pësojnë ndërprerje, duke argumentuar se nuk është praktikë standarde publikimi i një liste të shërbimeve qeveritare të prekura. “Disa shërbime të kufizuara qeveritare mund të jenë jashtë funksionit”, thuhet në deklarimin e Downing Street, ndërsa theksohet se shërbimet kryesore që janë kritike për publikun nuk janë prekur.

Sipas zëdhënëses, puna për identifikimin dhe rregullimin e ekspozimeve të mundshme të sistemeve është kryer në të gjithë administratën qeveritare. “Ekspertët tanë po vazhdojnë të punojnë ngushtë si me OpenAI, ashtu edhe me partnerët ndërkombëtarë për këtë çështje”, deklaroi ajo.

Megjithatë, autoritetet theksuan se identifikimi i ekspozimeve të mundshme nuk do të thotë domosdoshmërisht se sistemet janë sulmuar nga hakerat.

“Por kjo nuk do të thotë se ata u sulmuan nga hakerat dhe puna vazhdon për të zgjidhur çdo problem”, u shpreh zëdhënësja.

Downing Street nuk ka dhënë detaje të mëtejshme mbi natyrën e plotë të problemit të lidhur me PHP-në, shërbimet që mund të preken apo kohën e nevojshme për përfundimin e ndërhyrjeve teknike.

/rtsh.al/