Prokuroria Publike Evropiane (EPPO) ka nisur të mërkurën kontrollin e zyrave administrative të grupit parlamentar të ekstremit të djathtë “Patriots for Europe” në Parlamentin Evropian, si pjesë e një hetimi për korrupsion që lidhet me paraardhësin e tij.

Sipas njoftimit të vetë grupit “Patriots for Europe”, kontrolli ka nisur “që nga këtë mëngjes” në zyrat e tyre administrative në Bruksel dhe Strasburg. Grupi është formacioni parlamentar ku bën pjesë partia e Marine Le Pen, e cila aktualisht konsiderohet si favoritja kryesore për zgjedhjet presidenciale në Francë.

Hetimi i Prokurorisë Publike Evropiane fokusohet në dyshime për abuzim me fondet e Bashkimit Evropian nga grupi i mëparshëm, i cili tashmë nuk ekziston më. EPPO, e cila ka kompetencë për të hetuar krime që prekin interesat financiare të BE-së, po kryen kontrolle në dy qytetet kryesore të Parlamentit Evropian.

Grupi “Patriots for Europe” konfirmoi se zyrat e tij janë nën kontroll, por deri më tani nuk ka dhënë detaje të mëtejshme mbi përmbajtjen e hetimit apo mbi personat e përfshirë. Nga ana tjetër, autoritetet e BE-së nuk kanë publikuar ende një deklaratë zyrtare të detajuar për këtë operacion, transmeton France 24. 

Ky zhvillim vjen në një kohë të tensionuar politike në Evropë, ku forcat e ekstremit të djathtë kanë fituar terren në disa vende anëtare dhe kanë rritur ndikimin e tyre brenda Parlamentit Evropian. Partia e Marine Le Pen, “Rassemblement National”, është një nga forcat kryesore brenda grupit “Patriots for Europe”.

/rtsh.al/