Protesta e transportuesve të mallrave në Italinë e Jugut po shkakton pasoja të rënda për ekonominë, me mungesë të lëndëve të para, vështirësi në furnizimin e supermarketeve dhe radhë në pikat e karburantit. Shoqatat e industrialistëve në Kampania dhe Pulia i kanë kërkuar qeverisë italiane të ndërhyjë menjëherë, duke paralajmëruar se aktiviteti prodhues po shkon drejt paralizës.

Në një deklaratë të përbashkët, Unioni i Industrialistëve të Napolit dhe i katër provincave të tjera të Kampanias, së bashku me Confindustria Bari dhe Barletta-Andria-Trani, theksuan se situata po bëhet gjithnjë e më e vështirë për bizneset, raporton TgCom24.

“Mosmarrëveshja e transportuesve kërkon përgjigje të menjëhershme. Aktiviteti prodhues është në prag të paralizës për shkak të mungesës së furnizimeve”, thuhet në deklaratë.

Përfaqësuesit e industrisë kërkuan përfundimin e bllokimeve, duke paralajmëruar se dëmet për kompanitë dhe konsumatorët, të cilat tashmë janë të konsiderueshme, rrezikojnë të bëhen të papërballueshme.

Sipas tyre, ndërprerjet po dëmtojnë ekonominë e Kampanias, Pulias dhe të gjithë Italisë së Jugut, duke rrezikuar edhe ofrimin e disa shërbimeve publike thelbësore. Ata u kanë bërë thirrje të gjitha palëve të tregojnë përgjegjësi dhe të gjejnë një zgjidhje.

Fabrika me 400 punonjës paralajmëron ndërprerjen e prodhimit
Pasojat e protestës po ndihen edhe në sektorin ushqimor. Kompania Gias, një prodhues i ushqimeve të ngrira me seli në Mongrassano, në provincën e Kozencës, ka paralajmëruar se do të ndërpresë linjat e prodhimit nëse furnizimi me lëndë të para nuk rikthehet deri më 22 tetor.

Presidentja dhe administratorja e deleguar e kompanisë, Gloria Tenuta, deklaroi për agjencinë ANSA se ndërprerja mund të prekë nga 200 deri në 300 punonjës, nga rreth 400 që ka gjithsej kompania.

“Ndërprerja e prodhimit nis që nesër, sepse nuk kemi më hapësirë ku të ruajmë mallrat dhe na mungojnë furnizimet me lëndë të para”, shpjegoi Tenuta.

Ajo paralajmëroi se bllokimi i transportit po godet rëndë zinxhirin ushqimor, veçanërisht produktet e freskëta, pasi pa kamionë kompanitë nuk mund të marrin prodhimet bujqësore dhe as të shpërndajnë produktet e përpunuara.

Drejtuesja e kompanisë shprehu mirëkuptim për shqetësimet e transportuesve, por kritikoi vonesat e autoriteteve për të gjetur një zgjidhje konkrete.
“E kuptoj protestën, por jo këtë vonesë të vazhdueshme dhe të pakuptueshme në përgjigjet e qeverisë. Deri tani kemi parë vetëm njoftime të mëdha, pa masa konkrete”, deklaroi ajo.

Sipas Tenutës, lehtësimet fiskale për transportuesit nuk janë të mjaftueshme për të zgjidhur krizën. Ajo paralajmëroi se një javë bllokime mund të shkaktojë humbje të konsiderueshme ekonomike dhe dëme të vështira për t’u llogaritur për kompanitë e mëdha dhe bizneset e vogla e të mesme.

Protesta e transportuesve ka nisur për shkak të rritjes së çmimeve të karburanteve dhe kostove të operimit, të cilat sipas tyre po e bëjnë gjithnjë e më të vështirë vazhdimin e aktivitetit. Mobilizimi është përhapur në disa rajone të Italisë së Jugut, duke përfshirë Kampanian, Pulian, Kalabrinë, Siçilinë, Bazilikatën dhe Molizen.

Ndërsa transportuesit kërkojnë ndërhyrjen e qeverisë për të përballuar kostot, kompanitë industriale paralajmërojnë se zgjatja e bllokimeve mund të sjellë ndërprerje të tjera të prodhimit, probleme në furnizimin me ushqime dhe pasoja më të gjera për ekonominë e vendit.