Qendra Kombëtare e Urgjencës Mjekësore (QKUM) ka dalë me një reagim dhe përgënjeshtrim zyrtar lidhur me disa pretendime të shpërndara në rrjetet sociale, sipas të cilave mjetet e ndihmës së shpejtë po përdoreshin për furnizimin e forcave të rendit me gaz lotsjellës gjatë protestave në kryeqytet.

Përmes një deklarate publike, QKUM-ja i ka hedhur poshtë kategorikisht këto pretendime, duke sqaruar misionin e saj në terren: “Informojmë të gjithë qytetarët dhe protestuesit se autoambulancat dhe ekipet mjekësore janë në terren vetëm për t’u ardhur në ndihmë personave që kanë nevojë për ndihmë të shpejtë mjekësore”.

Gjithashtu, institucioni u bëri thirrje protestuesve dhe opinionit publik për ndërgjegjësim, duke tërhequr vëmendjen mbi rreziqet që sjell bllokimi i mjeteve të emergjencës. Sipas QKUM-së, “pengimi i qarkullimit dhe aktet e dhunës ndaj ambulancave apo ekipeve mjekësore vonojnë ndërhyrjen emergjente dhe rrezikojnë drejtpërdrejt jetën e pacientëve në nevojë, si dhe sigurinë e stafit tonë”.

Për të garantuar transparencën dhe për të shmangur keqkuptimet në terren, QKUM-ja ka publikuar edhe listën e plotë të targave të mjeteve që ndodhen aktualisht në shërbim aktiv:

• Seria AC: AC 410 AC, AC 878 AC, AC 656 AC, AC 342 AC
• Seria AB: AB 657 CF, AB 703 CF, AB 946 CF, AB 776 CF, AB 245 FV, AB 846 CF
• Seria AA: AA 813 VU, AA 874 VU

Në përmbyllje të njoftimit, institucioni rikujton se për çdo urgjencë mjekësore qytetarët mund të telefonojnë menjëherë në numrin pa pagesë 127.

/rtsh.al/