Milani mundi Atalantën 3-2 me jo pak vështirësi në fundin e ndeshjes. Adrien Rabiot, një nga titullarët më me peshë të skuadrës, nuk u shfaq i lumtur pas këtij suksesi, madje ai ngriti zërin ndaj ekipit.

“Bëmë shumë mirë pjesën e parë. Pastaj, çuditërisht në të dytën humbëm fillin e ndeshjes. Jam shumë i nevozuar, sepse nëse bëjmë një pjesë të dytë të tillë nuk shërben për asgjë të luash mirë në pjesën e parë. Fatmirësisht fituam, por nuk e di nëse e merituam”, – tha Rabiot.

Mesfushori francez më tej përpiqet të shpjegojë rëniet që Milani ka shfaqur thuajse në çdo ndeshje: “Nuk është çështje fizike, por psikologjike. Ishim në avantazh të tre golave dhe pastaj e ulëm vëmendjen dhe përqendrimin. Kur përballesh me një skuadër me kualitet rrezikon që të barazohesh apo të humbasësh.

E kam thënë që pas ndeshjes me Sassuolo-n: duhej të punonim mbi mentalitetin. Edhe ata që hyjnë në fushë nga stoli duhet të bëjnë diçka më shumë, të hyjnë mirë në ndeshje. Futbolli është kështu, nëse humb përqendrimin rrezikon t’i humbasësh ndeshjet. Gjithsesi, janë 3 pikë të rëndësishme”.