Kryeministri Edi Rama u ka vënë kusht kryebashkiakëve socialistë se mundësia për të rikandiduar në zgjedhjet vendore të vitit 2027 do të lidhet drejtpërdrejt me realizimin e objektivave të qeverisë për “paketën e maleve”.

Rama deklaroi se deri në fund të mandatit të tretë duhet të hapet rruga për 1 mijë investime në 61 bashki, përmes kësaj pakete, ndërsa çdo bashki do të ketë një target të përcaktuar sipas madhësisë dhe potencialeve.

Kryeministri kritikoi kryebashkiakët për vonesat në përcaktimin e hartave të zonave prioritare, duke theksuar se kjo nuk është “shkencë e madhe” dhe se procesi duhet të përshpejtohet.

“Jo të gjitha bashkitë e kanë kryer fazën e parë, është e papranueshme. Në momentin kur paketa e maleve u shpall ditën e parë kishte mbi 700 interesime nga shqiptarë jashtë atdheut. Është investim i sigurt për të tërhequr kursimet e tyre dhe për t’i kthyer ata. Ambicia jonë duhet të jetë 1 mijë investime nga kjo paketë. S’do ketë rikandidim nëse nuk arrihet targeti i këtij projekti”, tha Rama.

Rama kërkoi nga ministrit përkatës të përcaktojë numrin e investimeve që duhet të jenë futur në proces për çdo bashki, duke paralajmëruar se rikandidimi i kryebashkiakëve do të kushtëzohet nga arritja e këtyre objektivave.

/rtsh.al/