Këshilli i Ministrave i Republikës së Shqipërisë, me propozimin e Ministrit të Infrastrukturës dhe Energjisë, ka miratuar zyrtarisht Marrëveshjen Ndryshuese Nr. 2 (me shkëmbim notash) të marrëveshjes ndërshtetërore me Qeverinë e Republikës së Italisë për njohjen e ndërsjellë të lejeve të drejtimit me qëllim konvertimi.

Ky vendim bazohet në nenin 100 të Kushtetutës dhe në legjislacionin në fuqi për marrëveshjet ndërkombëtare (Neni 19 i Ligjit nr. 43/2016).

Vendimi i ri ndryshon dhe përditëson kuadrin dypalësh të bashkëpunimit tekniko-administrativ që ishte miratuar më parë nga ekzekutivi shqiptar.

Lidhur me këtë vendimmarrje, akti zyrtar përcakton bazën dhe objektin e miratimit.

Vendimi zyrtarizon “miratimin e marrëveshjes ndryshuese nr.2 me shkëmbim notash të marrëveshjes, ndërmjet Këshillit të Ministrave të Republikës së Shqipërisë dhe qeverisë së Republikës së Italisë, mbi njohjen e ndërsjellë të lejeve të drejtimit, me qëllim konvertimi, miratuar me vendimin nr.209, datë 29.3.2021, të Këshillit të Ministrave.”

Përmes këtij miratimi zyrtarizohet teksti i ri i bashkëlidhur vendimit, duke lehtësuar dhe garantuar vijueshmërinë e procedurave të konvertimit të lejeve të drejtimit për qytetarët shqiptarë dhe italianë që jetojnë e punojnë në të dyja vendet.

/rtsh.al/