Ministrja e Shëndetësisë dhe Mirëqenies Sociale, Klodiana Spahiu, ka vizituar Spitalin Universitar të Traumës, ku po marrin trajtim mjekësor dhjetëra efektivë të Policisë së Shtetit dhe protestues të lënduar gjatë përplasjeve në Tiranë.

Spahiu ka shprehur mirënjohjen për mjekët dhe infermierët, të cilët gjatë pesë ditëve të protestave kanë vijuar punën pa ndërprerje, duke ofruar kujdes shëndetësor për të gjithë personat e lënduar.

Ministrja theksoi se ndihma mjekësore është ofruar pa dallim, ndërsa nënvizoi rëndësinë e mbrojtjes së jetës dhe shëndetit të çdo qytetari, pavarësisht nëse bëhet fjalë për protestues apo punonjës të policisë.

“Mirënjohje për të gjitha ekipet e mjekëve dhe infermierëve, që gjatë këtyre pesë ditëve kanë qenë pa ndërprerje në krye të detyrës, duke ofruar kujdes dhe ndihmë mjekësore për çdo të lënduar, pa asnjë dallim”, thuhet në reagimin e ministres.

Spahiu theksoi se shëndeti dhe jeta e çdo qytetari mbeten mbi gjithçka, në një kohë kur protestat në kryeqytet janë shoqëruar me përplasje dhe dhjetëra të lënduar që kanë kërkuar ndihmë mjekësore.

/rtsh.al/