Ministri për Evropën dhe Punët e Jashtme, Ferit Hoxha, u ka bërë thirrje shqiptarëve të Luginës së Preshevës që të marrin pjesë masivisht në zgjedhjet e parakohshme parlamentare që zhvillohen sot në Serbi.

Hoxha thekson rëndësinë e pjesëmarrjes në votime, duke e cilësuar atë si një mundësi për të forcuar zërin dhe përfaqësimin e shqiptarëve në Luginën e Preshevës.

Ai u bëri thirrje qytetarëve që të ushtrojnë lirisht të drejtën e tyre demokratike dhe të marrin pjesë në procesin zgjedhor.

“Të dashur bashkëatdhetarë, qytetarë të Luginës së Preshevës. Pjesëmarrja në zgjedhje është një e drejtë themelore demokratike, por edhe një mundësi e rëndësishme për të bërë që zëri juaj të dëgjohet dhe të ketë peshën që meriton.

Sot është dita për ta bërë këtë, duke marrë pjesë masivisht në votime dhe duke ushtruar lirisht të drejtën tuaj demokratike.

Çdo votë ka rëndësi.  Sa më e madhe pjesëmarrja, aq më i fortë është zëri juaj për të drejtat, përfaqësimin dhe të ardhmen e shqiptarëve në Luginën e Preshevës.

Dilni dhe votoni. Për zërin tuaj, për të drejtat tuaja, për të ardhmen tuaj”, shkruan Hoxha në X.

Serbia zhvillon sot zgjedhjet e parakohshme parlamentare, në një garë që vë në provë pushtetin e Aleksandar Vuçiçit dhe të Partisë Përparimtare Serbe (SNS). Përballë tyre qëndron Lista Studentore, e dalë nga protestat masive kundër qeverisë.

/rtsh.al/