Ambasada e Zvicrës në Shqipëri ka reaguar përmes rrjeteve sociale lidhur me ngjarjet e fundit gjatë demonstratave në vend, duke shprehur shqetësimin për shpërthimet e dhunës dhe dëmtimin e pronës publike e private.

Në deklaratën e publikuar, ambasada u bën thirrje të gjitha palëve të tregojnë vetëpërmbajtje, të ulin tensionet dhe t’i japin përparësi dialogut konstruktiv, duke theksuar se e drejta për tubim paqësor është themelore për një shoqëri demokratike.

“Zvicra është e shqetësuar për shpërthimin e fundit të dhunës dhe shkatërrimin e pronës publike e private gjatë demonstratave në Shqipëri. U bëjmë thirrje të gjitha palëve të ushtrojnë përmbajtje, të ulin tensionet dhe t’i japin përparësi dialogut konstruktiv. E drejta për tubim paqësor është thelbësore për një shoqëri demokratike”, thuhet në reagim.

Më tej, Ambasada e Zvicrës u kërkon autoriteteve shqiptare që të garantojnë dhe mbrojnë plotësisht të drejtën për tubim paqësor, si dhe lirinë e medias. Gjithashtu, apelohet që forcat e sigurisë të veprojnë në përputhje me standardet ndërkombëtare të të drejtave të njeriut.

Reagimi vjen pas incidenteve të regjistruara gjatë protestave të fundit në Shqipëri, të cilat janë shoqëruar me përplasje dhe dëmtime të pronës publike e private.

/rtsh.al/