Forcat zjarrfikëse po përpiqen të vënën nën kontroll zjarrin në malin Parnitha, më i larti i maleve në afërsi të kryeqytetit Athinë, ku erërat e forta po krijojnë një situatë të vështirë.

Në zonë janë angazhuar rreth 260 forca zjarrfikës, 77 automjete, 6 avionë dhe 7 helikopterë. 

Banorët e Athinës janë ata që po përballen me tymin dhe hirin e shkaktuar nga zjarri.

Në Kelafonia, ndërkohë, një zjarrfikës sezonal është vënë nën akuzë për zjarrvënie të qëllimshme, pasi u arrestua pas një hetimi të ndërmarrë nga drejtoria e krimeve të zjarrvënies për zjarrin që filloi në zonën Aghia Irini.

I pandehuri e ka pranuar krimin dhe ka bërë të ditur se është përgjegjës për pesë zjarre të tjera gjatë viteve të shkuara.

Që të premten e shkuar, në Greqi janë shënuar 355 vatra zjarri, përfshirë 209 në 48 orët e fundit. 

Ministri i Mbrojtjes Civile, Vassilis Kikilias, tha se ekipet e angazhuara po ndërmarrin veprime mbinjerëzore për t’i vënë nën kontroll.

Zjarret në Greqi janë të zakonshme gjatë verës, por këtë vit situata ka qenë e rëndë për shkak të të nxehtit ekstrem dhe erërave për të cilat shkencëtarët thonë se kanë lidhje me ndryshimet klimatike.

Gazetare: Elda Pepa

/rtsh.al/