Në ambientet e Akademisë së Filmit dhe Multimedies, “Marubi”, u mbajt një aktivitet përkujtimor kushtuar një prej figurave më të shquara të artit skenik dhe kinematografik shqiptar, Bujar Lako.

Regjisori dhe aktori Mevlan Shanaj foli për njohjen e hershme me Lakon. Shanaj theksoi karakteristikat e veçanta të personalitetit të mikut të tij, të cilat e bënin të papërsëritshëm në rolet që interpretonte. Ndërsa Timo Flloko vlerësoi thellësinë emocionale dhe fuqinë shprehëse që Bujar Lako i jepte çdo personazhi.

“Ishte i bindur që do të bëhej aktor dhe u bë. Në çdo rol ai kishte një pozicion artisti sqimatar,” tha z. Shanaj.

“Bujari e filloi me një rol të vogël. Dhe i erdhi momenti që bëri Martin Krekën tek ‘Përballimi’, me Viktor Gjikën. Një zbulim. Ishte prova e tij e parë serioze, profesionale në kinema,” tregoi z. Flloko.

Ndërsa Kujtim Çashku rrëfeu bashkëpunimet me aktorin e ndjerë. Ai e vlerësoi Lakon si një aktor i cili i jepte ngjyra të ndryshme secilit interpretim.

“Te Bujari, sytë dhe mustaqet në portretin e tij janë të pandryshuara thuajse në gjithë galerinë e karaktereve të mishëruara prej tij. Na lind pyetja: përse një aktor e mban të pandryshuar sigmën?” u shpreh z. Çashku.

Nga “Përballimi” te “Ballë për ballë”, e deri te “Kolonel Bunker”, Lakoja solli në ekran figura komplekse me një thellësi dhe intensitet të lartë.

Interpretimet e tij mbeten gurë themeli të kinemasë shqiptare, dëshmi e një talenti që i dha shpirt çdo personazhi, si edhe një burim frymëzimi për brezin e ri.

Gazetare: Katerina Kule

/rtsh.al/