Një pajisje e re mjekësore, një stetoskop i avancuar me inteligjencë artificiale, ka mundësuar diagnostikimin e shpejtë të disa sëmundjeve të zemrës.

Studimi i kryer nga Imperial College London dhe Imperial College Healthcare NHS Trust ka treguar se ky stetoskop mund të zbulojë dështimin e zemrës, sëmundjen e valvulave dhe ritmet jonormale të zemrës brenda 15 sekondash.

Stetoskopi me inteligjencë artificiale përdor një mikrofon për të analizuar ndryshimet në rrahjet e zemrës dhe rrjedhjen e gjakut që veshi i njeriut nuk mund t’i zbulojë. Ai merr një EKG (elektrokardiogramë), duke regjistruar sinjale elektrike nga zemra dhe duke e dërguar informacionin në “cloud” për t’u analizuar nga inteligjenca artificiale e trajnuar mbi të dhënat nga dhjetëra mijëra pacientë.

Në një provë me 12 mijë pacientë në Londër, përdorimi i këtij stetoskopi ka rezultuar në diagnoza më të sakta krahasuar me metodat tradicionale. Për shembull, ai ka identifikuar sëmundjen e valvulave të zemrës 1,9 herë më shpesh dhe ritmet jonormale 3,5 herë më shumë sesa pajisjet aktuale.

Ky instrument është i lehtë për t’u përdorur dhe mund të ndihmojë mjekët të diagnostikojnë më shpejt dhe me saktësi.

Ekspertët shpresojnë që kjo teknologji të përdoret gjerësisht në të gjithë Mbretërinë e Bashkuar për të përmirësuar kujdesin shëndetësor dhe për të shpëtuar jetë.

Ky zhvillim është një hap i rëndësishëm drejt modernizimit të mjekësisë dhe përdorimit të teknologjisë për të përmirësuar shëndetin e pacientëve

Gazetar: Artur Mata

/rtsh.al/