Sulmet kibernetike mbi aeroportet europiane gjatë javëve të fundit shkaktuan vonesa të fluturimeve të qytetarëve dhe ngritën pikëpyetjen mbi sigurinë kibernetike në vendin tonë.

I ftuar në emisionin “Mirëmëngjes Shqipëri”, Jetmir Rajta, ekspert i sigurisë kibernetike, bëri me dije se në sektorë të ndryshëm të ekosistemit kibernetik në Shqipëri regjistrohen tentativa për sulme çdo tri minuta.

“Një ngjarje e tillë na vuri dhe ne në alarm këtu në Shqipëri. Ne në AKSK rritëm nivelin e monitorimit mbi infrastrukturat kritike. Ky është hap fillestar se ç’ndodhi në këtë sulm. Duke parë këto trendë ne i kushtojmë vëmendje shumë të veçantë këtij sektori, duke pasur bashkëpunim me Albcontrol, Aeroporti Ndërkombëtar i Tiranës, autoriteti i Aviacionit Civil. Ne regjistrojmë tentativa për sulm kibernetik çdo 3 minuta, mbi ekosistemin tonë kibernetik në sektorë të ndryshëm”, deklaroi Rajta.

Ndalur te sulmet kibernetike në aeroportet në Gjermani, Belgjikë, Spanjë, Itali, Britaninë e Madhe, eksperti theksoi se siguria e fluturimeve nuk varet vetëm prej linjës ajrore, por një zinxhiri të tërë kompanish teknologjike. Në këto raste, eksperti sqaroi se u prek vetëm siguria e informacionit.

“Rreziku duhet parë në tri nivele që duhet parë sulmi: Kaosi operacion, kur bien sistemet e automatizuara dhe kalohet në procedura manuale.

Niveli i dytë është që rëndësia e palëve të treta. Siguria e udhëtimit tonë nuk varet vetëm nga linja ajrore, por një zinxhir i tërë  kompanish teknologjike që merren me mbarëvajtjen e udhëtimit, Kompromentimi i njërit nga këto sisteme, mund të shkaktoj efekt zinxhir”, tha ai.

/rtsh.al/