Tempulli i famshëm i Partenonit në Athinë është për herë të parë pa skela pas dy shekujsh, duke u ofruar vizitorëve një pamje të pakufizuar të monumentit historik.

Skela që kishte mbuluar fasadën perëndimore për rreth 20 vjet u hoq së fundmi, duke shënuar një moment të rëndësishëm në historinë e restaurimit të Akropolit.

Partenoni, i ndërtuar në shekullin e V para Krishtit për të nderuar perëndeshën Athina, është një nga simbolet më të njohura të trashëgimisë kulturore botërore dhe destinacioni turistik më i vizituar në Greqi, me 4.5 milionë vizitorë vetëm vitin e kaluar.

Ministrja e Kulturës e Greqisë, Lina Mendoni, tha se heqja e skelës ka rikthyer një pamje që nuk është parë për të paktën 200 vjet.

 “Të paktën dy breza nuk e kanë parë Partenonin vizualisht të lirë,” tha ajo, duke shtuar: “Por ta shohësh Partenonin plotësisht të lirë, siç është sot, është diçka që nuk ka ndodhur për të paktën 200 vjet.”

Megjithatë, kjo pamje e lirë nuk do të zgjasë shumë. Brenda një muaji pritet të ngrihet një grup i ri skelash në anën perëndimore për fazën e radhës së konservimit.

Sipas znj. Mendoni, skelat e reja do të jenë “më të lehta dhe estetikisht shumë më afër logjikës së monumentit”.

Puna e konservimit të Partenonit është pjesë e një përpjekjeje afatgjatë për të përballuar dëmet e shkaktuara nga zjarret, tërmetet dhe erozioni. Faza aktuale e restaurimit pritet të zgjasë deri në fillim të verës së ardhshme.

Ndërkohë, Greqia vazhdon përpjekjet për rikthimin e Mermerëve të Elginit – friza të lashta që u hoqën nga Partenoni në fillim të shekullit të 19-të nga fisniku skocez Lord Elgin. Bisedimet e fundit me Muzeun Britanik kanë ringjallur shpresat për kthimin e tyre në Athinë.

Ministrja Mendoni ka theksuar se “vendi natyror” për ekspozimin e mermerëve është Muzeu i Akropolit, i ndërtuar në vitin 2009 pikërisht për këtë qëllim.

/rtsh.al/