Kryeministri Edi Rama ka komentuar kritikat e opozitës lidhur me situatën e përmbytjeve në vend nga reshjet intesive të shiut.

Rama ironizon se pse “nuk fajësojnë ende atë” edhe për përmbytjet në rajon dhe Evropë, që po përballen me situatën e përmbytjeve.

Në një postim në X, Rama shton se në vendet e tjera “opozita nuk akuzon qeverinë” për fatkeqësitë natyrore.

“Nuk e kuptoj pse nuk po më fajësojnë akoma mua, qeverinë dhe bashkinë e Durrësit, për reshjet mbytëse të këtyre ditëve në Itali, Greqi, Mal të Zi, Kroaci e me radhë… Çudi e madhe opozitat andej, po të paktën të fajësonin qeveritë e tyre, po hiç, asnjë llaf”, shkruan Rama.

Vendi po përballet me përmbytje kryesisht në Shkodër, Lezhë, Gjirokastër dhe Durrës, ndërsa opozita ka akuzuar qeverinë për mungesë masash paraprake, korrupsion dhe neglizhencë në sistemin e mbrojtjes nga reshjet intensive.

/rtsh.al/