Kryeministri Edi Rama zhvilloi një vizitë në Bazilikën e Zojës së Këshillit të Mirë, e njohur si Regina di Albania, ku mbajti një lutje kushtuar popullit shqiptar, familjeve dhe brezit të ri.

Gjatë momentit solemn, kreu i qeverisë iu drejtua Zojës së Këshillit të Mirë me një mesazh përkushtimi dhe besimi, duke theksuar lidhjen shpirtërore që kjo figurë ka me shqiptarët brenda dhe jashtë vendit. Rama u shpreh se vizita kishte për qëllim besimin sërish të fatit të kombit shqiptar nën mbrojtjen e Virgjëreshës Mari.

“O Mari, Nënë e ëmbël e Këshillit të Mirë, kaq e dashur për bijtë e Shqipërisë në atdhe dhe jashtë atdheut!

Sot po vijmë tek ti, edhe një herë, të ta besojmë popullin tonë, familjet tona, rininë tonë. Ti që je Zojë e Shkodrës dhe e mbarë Shqipërisë, na udhëhiq në rrugën e së mirës, na jep dritë në dyshime dhe ngushëllim në provat e jetës. Nën mbrojtjen tënde kërkojmë strehë, o Virgjër e bekuar”, u shpreh Kryeministri gjatë lutjes, duke e cilësuar Zojën e Këshillit të Mirë si Zojë të Shkodrës dhe të mbarë Shqipërisë.

Në lutjen e tij, Edi Rama kërkoi udhëzim në rrugën e së mirës, dritë në kohë pasigurish dhe ngushëllim përballë sfidave të jetës, duke theksuar rëndësinë e besimit, unitetit dhe shpresës për të ardhmen e vendit.

“Mbroje Shqipërinë, ndriço mendjet tona dhe na bëj të jemi gjithmonë besnikë ndaj Birit tënd, Jezusit. O Zoja e Këshillit të Mirë, lutu për ne”, tha kryeministri.

Në këtë vizitë, kryeministri Edi Rama shoqërohet nga bashkëshortja e tij, Linda Rama dhe i biri, Zaho. Sipas agjendës zyrtare, kreu i qeverisë do të vizitojë Pallatin Apostolik të Vatikanit, ku do të pritet në oborrin “San Damaso” nga Prefekti i Shtëpisë Papnore dhe përfaqësues të Selisë së Shenjtë.

Më pas, Kryeministri do të zhvillojë një takim me Papa Leonin e 14-të në Bibliotekën Papnore të Pallatit Apostolik. Në përfundim të qëndrimit në Vatikan, Kryeministri Rama dhe bashkëshortja e tij do të vizitojnë vendvarrimin e Papa Françeskut në Bazilikën Santa Maria Maggiore.

/rtsh.al/