Pas reagimit të Delegacionit të Bashkimit Evropian, edhe Ambasada e Gjermanisë në Tiranë ka mbajtur një qëndrim të prerë lidhur me tensionet e ditëve të fundit në kryeqytet, duke dënuar ashpër çdo formë dhune gjatë tubimeve.

Përmes një deklarate publike, përfaqësia diplomatike gjermane u shpreh se mbështet fuqimisht qëndrimin e BE-së kundër akteve të dhunës, duke theksuar se “këto veprime janë tërësisht të papranueshme dhe dëmtojnë rëndë parimet demokratike të vendit.”

Në reagimin e saj, Ambasada Gjermane bëri një ndarje të qartë mes ushtrimit të lirive qytetare dhe cenimit të sigurisë publike. Institucioni theksoi se, ndonëse tubimet janë thelbësore për shoqërinë, ato kanë kufij të qartë ligjorë.

“Protesta politike dhe e drejta për të demonstruar nuk mund të justifikojnë kurrë dhunën kundër njerëzve ose pronës,” theksohet në deklaratë, duke iu përgjigjur kështu incidenteve të fundit ku pati dëme materiale dhe rrezik për qytetarët.

Apeli i drejtpërdrejtë për udhëheqësit politikë

Një theks i veçantë në këtë mesazh i është vendosur rolit të klasës politike shqiptare në menaxhimin e situatës dhe uljen e tensioneve. Ambasada i kujton politikës detyrimet e saj ndaj qytetarëve dhe stabilitetit të vendit.

“Udhëheqësit politikë duhet të përmbushin përgjegjësinë e tyre për bashkëjetesë paqësore në një demokraci,” përfundon apeli i selisë diplomatike gjermane.

/rtsh.al/