Presidenti amerikan Donald Trump ka lëshuar një paralajmërim të ri për aleatët e tij, duke theksuar se e ardhmja e NATO-s mund të vihet në rrezik nëse vendet anëtare tregojnë ngurrim për të kontribuar në ruajtjen e sigurisë së Ngushticës së Hormuzit.

Duke folur për Financial Times, Trump tha se “Organizata e Traktatit të Atlantikut të Veriut rrezikon një të ardhme shumë të keqe nëse shtetet e saj anëtare nuk ndihmojnë në rihapjen e Ngushticës”.

Ai shtoi se është “plotësisht e përshtatshme që ata që përfitojnë nga kjo ngushticë të ndihmojnë në garantimin se asgjë e keqe nuk do të ndodhë”, duke përfshirë edhe Kinën, e cila sipas tij përfiton nga qarkullimi në këtë zonë strategjike.

Trump theksoi se Uashingtoni ka marrë “disa përgjigje pozitive” nga vendet të cilave u është drejtuar për ndihmë në sigurimin e Ngushticës, megjithatë pranoi se disa qeveri preferojnë të mos përfshihen.

/rtsh.al/