Jasveen Sangha, e njohur në botën e krimit si “Mbretëresha e Ketaminës”, është dënuar sot me 15 vite burg për rolin e saj kyç në furnizimin me dozën vdekjeprurëse të narkotikëve që i mori jetën yllit të serialit “Friends”, Matthew Perry, në tetor të vitit 2023.

Vendimi i gjykatës erdhi pasi Sangha pranoi fajësinë për një sërë akuzash të rënda, përfshirë drejtimin e një qendre droge dhe shpërndarjen e ketaminës që rezultoi në vdekje. Ndonëse ajo rrezikonte deri në 65 vite burg, prokurorët ranë dakord për një dënim prej 15 vitesh, duke e cilësuar këtë si një ndëshkim “të rëndësishëm” për veprimtarinë e saj kriminale.

Sipas dokumenteve të gjykatës, Sangha kishte bashkëpunuar me trafikantë të tjerë për t’i siguruar aktorit dhjetëra shishe ketamine, përfshirë edhe dozën fatale që shkaktoi mbidozën në shtëpinë e tij në Los Anxhelos.

“Pandjeshmëri e ftohtë” ndaj jetës njerëzore

Prokurorët e çështjes argumentuan se Sangha tregoi një “shpërfillje të ftohtë” për jetën e të tjerëve. Ata zbuluan se shtëpia e saj në North Hollywood shërbente si një depo e madhe narkotikësh që nga viti 2019. Edhe pas vdekjes së një klienti tjetër, Cody McLaury, në vitin 2019, ajo nuk e ndaloi aktivitetin e saj.

“Ajo pati mundësinë të ndalonte pasi kuptoi ndikimin vdekjeprurës të aktivitetit të saj, por thjesht zgjodhi të mos e bënte,” akuzuan prokurorët, duke cituar edhe biseda nga burgu ku Sangha diskutonte me mburrje për “markën” e saj. Dhimbja e familjes Perry

Gjatë seancës, familja e aktorit shprehu pikëllimin e tyre të thellë. Njerka e Perry-t, Debbie Perry, deklaroi përmes një memorandumi se dhimbja që ka shkaktuar e pandehura është “e pakthyeshme”. Matthew Perry, i cili vdiq në moshën 54-vjeçare, kishte folur hapur për betejat e tij me varësinë, por ra pre e një rrjeti trafikantësh që shfrytëzuan dobësinë e tij për përfitime financiare.

Kronologjia e ngjarjes

Tetor 2023- Matthew Perry gjendet i vdekur në shtëpinë e tij. Autopsia konfirmon “efektet akute të ketaminës”.

Viti 2024- Jasveen Sangha dhe disa bashkëpunëtorë (përfshirë mjekë dhe asistentë) arrestohen dhe akuzohen.

8 Prill 2026- Shpallet dënimi përfundimtar prej 15 vitesh burg për Sangha-n.

/rtsh.al/