Gara për të veshur smokingun e spiunit më të famshëm në botë ka hyrë zyrtarisht në fazën e saj më të nxehtë. Pritja shumëvjeçare e fansave po shkon drejt fundit, pasi Amazon MGM Studios konfirmoi se kanë nisur audicionet për filmin e ardhshëm të ekskluzivitetit James Bond.

Përmes një deklarate të shkurtër zyrtare, kompania e prodhimit njoftoi se kërkimi për pasardhësit e Daniel Craig – i cili u përshëndet me rolin në vitin 2021 me filmin “No Time to Die” – tashmë ka filluar, duke lënë të hapur mundësinë për surpriza të mëdha, përfshirë përzgjedhjen e një aktori të ri apo ndoshta edhe të një gruaje.

“Kërkimi për James Bondin e ardhshëm është duke u zhvilluar. Procesi i përzgjedhjes së aktorëve sapo ka filluar. Jemi të emocionuar të ndajmë më shumë lajme me fansat e 007 sapo të vijë koha e duhur,” bën me dije studioja, duke mbajtur sekret detajet specifike të audicioneve të hershme.

Emrat në lojë, nga veteranët te yjet e rinj

Prej kohësh, qarku i thashethemeve në Hollivud ka qenë i mbingarkuar me emra të mëdhenj. Idris Elba, Henry Cavill dhe fituesi i çmimit Oscar, Cillian Murphy, mbeten ndër më të përfolurit nga publiku për të marrë timonin e makinës së famshme Aston Martin.

Megjithatë, listës së favoritëve së fundmi i janë shtuar edhe emra të rinj të skenës britanike dhe ndërkombëtare, si Callum Turner, Aaron Taylor-Johnson, Harris Dickinson, si dhe ylli në rritje australian, Jacob Elordi.

Kjo përzgjedhje shënon epokën e parë të kontrollit të plotë krijues nga Amazon MGM Studios, pasi vitin e kaluar të drejtat e serisë – të bazuar në romanet ikonike të Ian Fleming – kaluan nga producentët historikë Michael G. Wilson dhe Barbara Broccoli tek gjigandi i ri i prodhimit.

Denis Villeneuve merr drejtimin; skenari nga krijuesi i “Peaky Blinders”

Ndonëse filmi i ri nuk ka ende një titull zyrtar apo një aktor protagonist, prapaskenat premtojnë një projekt gjigand. Filmi i ri do të drejtohet nga regjisori i njohur franko-kanadez, Denis Villeneuve, i nominuar për çmimin Oscar dhe i vlerësuar maksimalisht për kryeveprat e tij të fundit si “Dune”, “Blade Runner 2049” dhe “Arrival”.

Për më tepër, skuadra e prodhimit vjen me emra të rëndësishëm:

Producentë- Amy Pascal dhe David Heyman, së bashku me producenten ekzekutive Tanya Lapointe.

Skenarist- Steven Knight, mendja gjeniale pas suksesit botëror të serialit “Peaky Blinders”.

Që nga viti 1962, kur Sean Connery hapi rrugën me filmin “Dr. No”, personazhi i James Bond është interpretuar nga legjenda si George Lazenby, Roger Moore, Timothy Dalton, Pierce Brosnan dhe së fundmi Daniel Craig. Ky i fundit la gjurmë të thella në histori me performancat në “Casino Royale” (2006), “Quantum of Solace” (2008), “Skyfall” (2012) dhe “Spectre” (2015).

/rtsh.al/