Zëdhënësi i Komisionit Qendror të Zgjedhjeve në Kosovë, Valmir Elezi, bëri me dije se shpallja e rezultatit përfundimtar të zgjedhjeve të 7 qershorit varet nga përmbyllja e procedurave ankimore dhe vendimet që do të nxirren nga institucionet përkatëse. Pas marrjes së këtyre vendimeve, mbetet të shihet nëse ato përmbajnë detyrime konkrete për KQZ-në, deklaroi Elezi.

Partia Demokratike e Kosovës është subjekti i vetëm që ka depozituar dy ankesa në Panelin Zgjedhor për Ankesa dhe Parashtresa lidhur me procesin e rinumërimit të 185 kutive të votimit, ndërsa afati 48-orësh për paraqitjen e tyre përfundoi mesditën e së dielës. Ai organ ka afat deri të martën për të dhënë vendimin dhe pas këtij procesi i hapet rruga shpalljes së rezultateve përfundimtare, ku sipas të dhënave paraprake Lëvizja Vetëvendosje e Albin Kurtit doli fituese, e pasuar nga PDK, LDK dhe AAK.

Më herët, KQZ parashikoi se certifikimi i rezultatit pritet të përfundojë deri në fillim të muajit korrik, për të vijuar më tej me konstituimin e Kuvendit, zgjedhjen e qeverisë dhe presidentit të ri. Kosova mbajti zgjedhjet e parakohshme parlamentare pasi legjislatura e 10-të dështoi të zgjedhë kreun e ri të shtetit që do të pasonte në detyrë Vjosa Osmanin.

/RTSH/