Nga mbledhja e qeverisë, kryeministri në detyrë i Kosovës Albin Kurti deklaroi se procesi i krijimit të institucioneve të reja pas konstituimit të Kuvendit do të vijojë me krijimin e qeverisë së re dhe më pas me presidentin.

 “Sapo të certifikohet rezultati i zgjedhjeve do të nisim punën dhe diskutimet për formimin e institucioneve të reja, konstituimin e legjislaturës të 11-të të Kuvendit, formimin e qeverisë së re dhe zgjedhjen e presidentit.”

Nisur nga rezultati i zgjedhjeve të 7 qershorit, ku Lëvizja Vetëvendosje doli sërish e para, Kurti tha se ai proces ishte i panevojshëm, ndërkohë u kërkoi partive politike të pranojnë dhe respektojnë vullnetin e qytetarëve të shprehur me votë.

 “Sido që të jetë qytetarët folën sërish qartë. Rezultati duhet të pranohet e të respektohet dhe vullneti i popullit të zbatohet e përkthehet në institucione funksionale demokratike të angazhuara e përkushtuara për zhvillim e mirëqenie, arsim e shëndetësi, për siguri e mbrojtje, industri e prodhim, investime të mëdha infrastrukturore”, tha ai.

Zgjedhjet e parakohshme të 7 qershorit u zhvilluan pasi partitë parlamentare dështuan të arrijnë marrëveshje për të zgjedhur kreun e ri të Shtetit.

/rtsh.al/