Sinoptikani Hakil Osmani ka paralajmëruar një javë me temperatura të larta në Shqipëri, me rritje të ndjeshme të vlerave termike sidomos nga dita e mërkurë dhe në vijim.

I ftuar në emisionin “Mirëmëngjes Shqipëri” në RTSH, Osmani tha se temperaturat gjatë kësaj jave do të jenë të larta në pjesën më të madhe të territorit, ndërsa kulmi i të nxehtit pritet të jetë të enjten dhe të premten.

“Gjatë kësaj jave temperaturat luhaten në pjesën më të madhe të territorit shqiptar në 37-38 gradë Celsius në Ultësirën Perëndimore. Pritet që lehtësisht të kemi edhe temperatura disi më të larta se 38 gradë”, u shpreh Osmani.

Sipas tij, nga mesi i javës një masë ajrore e nxehtë do të përfshijë Europën jugore, duke sjellë rritje të mëtejshme të temperaturave edhe në vendin tonë.

“Duke filluar nga dita e mërkurë, e enjte dhe e premte pritet të kemi rritje të temperaturave të ajrit. Maksimumet në qytetet e zonave të ulëta do të afrohen shumë pranë vlerave 40 gradë Celsius, duke përfshirë edhe kryeqytetin”, tha sinoptikani.

Zonat që pritet të regjistrojnë temperaturat më të larta janë qarku i Elbasanit, Beratit dhe Shkodrës. Osmani përmendi veçanërisht disa zona ku temperaturat mund të kalojnë edhe mbi 40°C.

“Lokalitete të Shkodrës si Kopliku, por edhe zona qendrore si Elbasani, Belshi, Ura Vajgurore dhe Kuçova pritet që temperaturat e ajrit lehtësisht të kalojnë edhe mbi 40°C”, deklaroi ai.

Edhe Tirana pritet të përballet me temperatura të larta, me maksimumet që mund të arrijnë rreth 39°C. Megjithatë, sinoptikani theksoi se ndjesia e temperaturës ndryshon sipas zonave urbane.

“Nëse marrim për shembull sheshin Skënderbej, temperaturat e ajrit do të ndihen më të larta sesa në zonën e Liqenit, ku pemët dhe hija bëjnë që temperaturat të ndihen më të ulëta”, u shpreh Osmani.

Sipas tij, edhe temperaturat e mëngjesit pritet të rriten, duke bërë që netët dhe orët e para të ditës të jenë më të nxehta.

“Minimumet në Ultësirën Perëndimore pritet të luhaten nga 20 deri pranë vlerave 27-28 gradë Celsius, duke bërë që të kemi mëngjese mjaft të nxehta”, tha ai.

Gjatë kësaj jave pjesa më e madhe e territorit do të dominohet nga moti i kthjellët, ndërsa në zonat verilindore mund të ketë vranësira dhe reshje të izoluara gjatë ditëve të mërkurë dhe të enjte.

Osmani paralajmëroi edhe për rritjen e rrezikut të zjarreve, për shkak të temperaturave të larta dhe tharjes së terrenit.

“Ditë pas dite shtohet rreziku i zjarreve, pasi kemi temperatura të larta dhe vendi bëhet më i thatë”, theksoi ai.

Duke folur për situatën në Europë, sinoptikani tha se vala e të nxehtit lidhet me masat e nxehta ajrore që kanë përfshirë kontinentin, ndërsa temperaturat ekstreme janë regjistruar në disa vende të Mesdheut.

Ai nënvizoi se temperaturat rreth 40°C nuk duhet të konsiderohen normale, edhe pse vitet e fundit janë bërë më të shpeshta.

“Temperatura 40 gradë Celsius është e regjistruar në hije. Nëse ne ecim të ekspozuar ndaj diellit, sigurisht që i ndjejmë edhe në 44 apo 45 gradë”, paralajmëroi Hakil Osmani.

Sipas parashikimit, fundjava mund të sjellë një ulje të lehtë të temperaturave me rreth 2-3 gradë, por vlerat do të mbeten sërish të larta, rreth 37-38°C.