Policia e Himarës ka finalizuar operacionin e koduar “Shuma”, duke zbardhur një grabitje me dhunë të ndodhur në Borsh, ku një 70-vjeçar u mbajt nën presion dhe u kanos me një imitues arme zjarri me qëllim vjedhjen e parave.

Pas hetimeve intensive, specialistët e Seksionit për Hetimin e Krimeve në Komisariatin e Policisë Himarë identifikuan, lokalizuan dhe arrestuan tre autorët e dyshuar të ngjarjes.

Në pranga ranë: E. Xh., 25 vjeç, banues në Selenicë; K. T., 23 vjeç, banues në Vlorë; A. C., 19 vjeç, banues në Vlorë.

Sipas policisë, tre të rinjtë kishin mbajtur nën vëzhgim banesën e të moshuarit për dy ditë, përpara se të kryenin grabitjen. Për realizimin e krimit, ata kishin marrë edhe me qira një automjet, i cili u sekuestrua nga autoritetet.

Hetimet zbuluan se autorët kishin hyrë në banesën e 70-vjeçarit më 12 korrik 2026, ku e kishin mbajtur me dhunë dhe e kishin kërcënuar me një imitues arme zjarri, konkretisht një pistoletë çakmak, me qëllim marrjen e një shume parash.

NJOFTIMI I POLICISË

Himarë / Finalizohet operacioni policor i koduar “Shuma”.

Hynë në banesën e një të moshuari, e mbajtën me dhunë dhe e kanosën me një imitues arme zjarri (pistoletë çakmak), me qëllim vjedhjen e një shume parash. Identifikohen, kapen dhe arrestohen 3 autorët e dyshuar.

Njëri prej të arrestuarve ishte me masë sigurie “Arrest në shtëpi”, për krime në fushën e narkotikëve.

Autorët kishin mbajtur në vëzhgim banesën e 70-vjeçarit për 2 ditë dhe kishin marrë me qira një automjet për të kryer krimin.

Sekuestrohet automjeti tip “Mercedes-Benz”.

Si rezultat i veprimeve intensive hetimore dhe operacionale, të kryera menjëherë pas kallëzimit të një 70-vjeçari, se më datë 12.07.2026, në fshatin Borsh, 3 shtetas kishin hyrë në banesën e tij, e kishin mbajtur me dhunë dhe e kishin kanosur me një imitues arme zjarri, me qëllim vjedhjen e një shume parash, specialistët e Seksionit për Hetimin e Krimeve të Komisariatit të Policisë Himarë finalizuan operacionin policor të koduar “Shuma”.

Në kuadër të operacionit u identifikuan, u lokalizuan dhe u vunë në pranga shtetasit:

E. Xh., 25 vjeç, banues në Selenicë;

K. T., 23 vjeç, banues në Vlorë;

A. C., 19 vjeç, banues në Vlorë.

Nga verifikimet rezultoi se shtetasi A. C. kishte thyer masën e sigurisë “Arrest në shtëpi”, të caktuar nga Gjykata për krime në fushën e narkotikëve.

Nga hetimet rezultoi se 3 shtetasit kishin mbajtur banesën e 70-vjeçarit në vëzhgim për 2 ditë dhe kishin marrë me qira një automjet për të shkuar në vendin e ngjarjes dhe për të kryer krimin.

Materialet procedurale iu referuan Prokurorisë, për veprime të mëtejshme.