Dy persona me precedentë të theksuar penalë për vjedhje janë arrestuar në flagrancë në Vlorë, pasi kishin thyer masën e sigurisë “Arrest në shtëpi” dhe kishin udhëtuar nga Tirana për të kryer vjedhje në banesa.

Operacioni policor i koduar “Again”, i zhvilluar nga Komisariati i Policisë Vlorë, çoi në prangosjen e shtetasve A. G., 48 vjeç dhe A. H., 46 vjeç, të dy banues në Tiranë.

Sipas Policisë, të dy u kapën në momentin kur, me pajisje të posaçme për hapjen e bravave, po tentonin të hapnin derën e një banese në lagjen “Bashkimi”, me qëllim vjedhjen.

Verifikimet zbuluan se të arrestuarit ishin nën masën e sigurisë “Arrest në shtëpi”, të vendosur për të njëjtën vepër penale, por e kishin shkelur atë duke u larguar nga Tirana drejt Vlorës për të vijuar aktivitetin kriminal.

Gjatë operacionit, Policia sekuestroi pajisje të posaçme për hapjen e bravave dhe kasafortave, një automjet “Mercedes-Benz” që dyshohet se përdorej nga autorët, si dhe dy telefona celularë.

Materialet procedurale i janë referuar Prokurorisë për veprat penale “Vjedhja”, mbetur në tentativë, dhe “Largimi i të burgosurit nga vendi i qëndrimit”.