Qindra qytetarë dhe admirues të muzikës mbushën rrugët e një fshati bregdetar uellsian të shtunën, për t’i dhënë lamtumirën e fundit këngëtares së njohur Bonnie Tyler, ndërsa makina funerale po e përcillte trupin e saj drejt vendlindjes.

Ylli uellsian i muzikës pop, e nominuar për tre çmime Grammy dhe e njohur ndërkombëtarisht për baladën e saj ikonike të vitit 1983, “Total Eclipse of the Heart”, u nda nga jeta muajin e kaluar në një spital në Faro të Portugalisë, ku zotëronte një shtëpi, pas një operacioni urgjent në zorrë. Ajo u nda nga jeta në moshën 75-vjeçare.

Vendas dhe fansa të ardhur nga e gjithë Mbretëria e Bashkuar u mblodhën në rrugët e Mumbles, pranë qytetit të Swansea-t, për të parë kortezhin ku arkivoli i këngëtares ishte mbuluar me flamurin kombëtar uellsian. Dhjetëra të pranishëm u ndalën përpara ish-shtëpisë së saj duke vendosur buqeta me lule.

“Ajo gjithmonë kthehej në shtëpi dhe sigurohej që të kthehej te fansat e saj në Uells,” u shpreh mes emocioneve Carys Edwards, 18 vjeçe. “Këngët e saj prekën vërtet shumë njerëz këtu në Uells; ne e donim shumë.”

E lindur me emrin Gaynor Hopkins në Skewen, rreth 11 kilometra larg Swansea-t, Tyler u rrit në një familje minatori midis pesë motrave dhe vëllezërve. Karriera e saj artistike shënoi arritje të mëdha ndërkombëtare, përfshirë përfaqësimin e Britanisë së Madhe në Festivalin e Eurovizionit në vitin 2013. Për kontributin e saj në art, ajo u nderua në vitin 2022 nga Mbretëresha Elizabeth II me titullin Anëtare e Urdhrit të Perandorisë Britanike (MBE).

Suksesi i saj më i madh, “Total Eclipse of the Heart”, arriti majat e top-listave në Britani dhe SHBA, duke numëruar sot më shumë se 1 miliard dëgjime në platformat digjitale — një interes që u rizgjua ndjeshëm edhe gjatë eklipseve diellore të viteve të fundit. Përveç kësaj balade, Tyler njihet gjerësisht edhe për hite të tjera si “It’s a Heartache” dhe “Holding Out For a Hero”.

Sipas njoftimeve zyrtare, një ceremoni private për familjarët dhe miqtë do të zhvillohet të hënën në një kishë në Swansea, përpara se këngëtarja të bëjë udhëtimin e saj të fundit për në qytetin e saj të lindjes, Skewen.

/rtsh.al/