Një avion i British Airways që po fluturonte nga Londra drejt Çikagos shpalli emergjencë pasi pësoi një zbritje të menjëhershme prej rreth 28 mijë këmbësh (rreth 8.5 km) mbi Irlandë dhe u detyrua të kthehej në Britani.

Fluturimi BA295, me destinacion aeroportin O’Hare të Çikagos, ishte ngritur nga Heathrow në orën 12:14 të së hënës. Rreth një orë pas nisjes, Boeing 777-200ER kishte arritur lartësinë e fluturimit prej 37 mijë këmbësh, kur në bord u raportua një problem teknik.

Pak çaste më herët, pasagjerët kishin ndjerë turbulenca, ndërsa më pas maskat e oksigjenit u lëshuan nga tavani i avionit. Pilotët e ulën avionin në një lartësi nën 10 mijë këmbë dhe aktivizuan kodin e emergjencës 7700 për kontrollin ajror.

Avioni ndryshoi kurs dhe u rikthye drejt Anglisë. Sipas të dhënave të gjurmimit të fluturimit, ai qëndroi për një periudhë në një trajektore rrethore mbi kanalin e Bristolit, mes Pembrokeshire dhe North Devon, ndërsa konsumonte karburant për të ulur peshën dhe për të mundësuar një ulje normale.

Avioni u ul i sigurt në aeroportin Heathrow pak pas orës 17:00.
Një nga pasagjerët, Tom Nicholls, tha se turbulencat ishin të papritura, por zbritja drejt 9 mijë këmbëve nuk ishte veçanërisht e parehatshme. Ai tregoi se maskat e oksigjenit dolën nga tavani pak më vonë, duke shkaktuar pasiguri mes pasagjerëve.

British Airways konfirmoi se avioni u kthye në Heathrow pas një problemi teknik, duke theksuar se siguria e pasagjerëve dhe ekuipazhit ishte prioriteti kryesor. Kompania tha se pasagjerët zbritën normalisht nga avioni dhe se po punohej për të sistemuar udhëtimet e tyre.

Fotografi të publikuara në rrjetet sociale treguan maskat e oksigjenit të varura nga tavani gjatë kthimit të avionit.

Zbritja e shpejtë nën 10 mijë këmbë dhe përdorimi i kodit të emergjencës 7700 lidhen zakonisht me raste të presionit të kabinës, por British Airways nuk ka konfirmuar ende shkakun e saktë të incidentit.

Boeing 777-200ER që operonte fluturimin është ndër avionët më të vjetër ende në shërbim të British Airways, pasi i është dorëzuar kompanisë në korrik 1997.
Shumë prej pasagjerëve u sistemuan në fluturime të tjera që niseshin të martën.