Presidenti gjerman Frank-Walter Steinmeier ka zhvilluar një vizitë shtetërore në Paris, ku u zotua përkushtuar se Gjermania do të mbetet e ankoruar fort në Bashkimin Evropian. Deklarata e tij synon të qetësojë partnerët francezë pas sukseseve të fundit zgjedhore të partisë së ekstremit të djathtë, Alternativa për Gjermaninë (AfD), veçanërisht në shtetin lindor të Saksonisë-Anhalt.

Gjatë një konference të përbashkët me Presidentin francez Emmanuel Macron në Pallatin Élysée, Steinmeier nënvizoi se e ardhmja e Gjermanisë është e pandashme nga ajo e BE-së.

Mbrojtja e demokracisë në një “kohë trazirash”

Të dy udhëheqësit e pranuan se Evropa po kalon një periudhë mjaft komplekse, të ndikuar nga lufta në Ukrainë, sfidat gjeopolitike dhe rritja e radikalizmit politik brenda shoqërive përkatëse.

“Gjermanët do të mbeten evropianë të mirë. Gjermania mund të ketë sukses vetëm si një Gjermani evropiane, domethënë e integruar fort në Bashkimin Evropian,” u shpreh Steinmeier.

Ai shtoi se polarizimi shoqëror po e bën më të vështirë formimin e qeverive dhe vendimmarrjen politike. Nga ana e tij, Presidenti Macron vuri theksin te roli i rrjeteve sociale në nxitjen e dyshimeve ndaj institucioneve demokratike.

“Nëse Gjermania dhe Franca nuk ecin përpara së bashku, Evropa nuk do të bëjë asnjë përparim,” deklaroi Macron.

Nderimet ushtarake dhe marrëveshjet dypalëshe

Vizita zyrtare nisi me nderime ushtarake në Harkun e Triumfit, ku Steinmeier vendosi kurorë me lule pranë Varrit të Ushtarit të Panjohur dhe ndezi flakën përkujtimore.

Gjatë takimit në Élysée, të dy liderët morën pjesë në nënshkrimin e një marrëveshjeje për fuqizimin e shoqërisë civile, duke përfshirë Fondin e Qytetarëve Franko-Gjerman (me buxhet vjetor prej 5 milionë eurosh) nën ombrellën e Zyrës së Rinisë Franko-Gjermane.

Agjenda e vizitës shtetërore vijon me udhëtimin e të dy presidentëve drejt Bordosë, ku fokusi kryesor do të jetë bashkëpunimi ushtarak dhe mbrojtja evropiane.

/rtsh.al/