Një aksident fatal me pasojë vdekjen e dy të rinjve është regjistruar këtë të mërkurë (19 gusht) në rrugën nacionale Mitrovicë–Prishtinë.

Sipas të dhënave paraprake, bëhet me dije se si pasojë e aksidentit kanë humbur jetën dy persona, përkatësisht të moshave 22 dhe 24 vjeç.

Policia ndërkaq po heton për shkaqet e aksidentit dhe zbardhjen e plotë të ngjarjes.

Njoftimi i plotë:

Rreth orës 02:53, të datës 19 gusht 2026, në rrugën nacionale Mitrovicë–Prishtinë përkatësisht në segmentin rrugor në fshatin Smrekovnicë, ka ndodhur një aksident trafiku me fatalitet. Sipas të dhënave të para nga vendi i ngjarjes, në aksident është përfshirë një veturë, në të cilën ndodheshin shoferi dhe pasagjeri. Të njëjtit janë dërguar për trajtim mjekësor, ku mjekët kanë konstatuar vdekjen e tyre.

Me urdhër të prokurorit kompetent, trupat e pajetë të viktimave, meshkuj të moshës 22 dhe 24 vjeç, janë dërguar në Institutin e Mjekësisë Ligjore për obduksion. Njësia Rajonale e Trafikut, në koordinim dhe nën udhëheqjen e prokurorit kompetent, është duke ndërmarrë veprimet hetimore për rrethanat dhe shkaqet e aksidentit.

/rtsh.al/