Një ngjarje e rëndë është shënuar paraditen e kësaj të enjteje në plazhin e Orikumit, ku një pushues 72-vjeçar nga Tirana ka humbur jetën, pasi dyshohet se ka pësuar infarkt sapo ka hyrë në det.

Sipas informacioneve paraprake, i moshuari kishte shkuar për pushime në Orikum së bashku me familjen. Rreth orës 11:30, menjëherë pasi hyri në ujë, ai është ndier keq dhe ka humbur ndjenjat.

Pushuesit dhe familjarët e nxorën menjëherë në breg dhe njoftuan shërbimet e urgjencës. Në vendngjarje mbërriti ambulanca e Orikumit, por me gjithë përpjekjet e ekipit të urgjencës, 72-vjeçari nuk mundi të rikthehej në jetë.

Paraprakisht dyshohet se shkak i vdekjes ka qenë një infarkt kardiak, ndërsa autoritetet pritet të përcaktojnë shkakun e saktë pas kryerjes së veprimeve përkatëse hetimore.

Orikum / Informacion paraprak

Rreth orës 12:00, në plazhin e Orikumit, shtetasi A. Z., 72 vjeç, sapo është futur në ujë, dyshohet se ka pësuar arrest kardiak dhe si pasojë ka humbur jetën.

Grupi hetimor, nën drejtimin e Prokurorisë, vijon veprimet për sqarimin e plotë të rrethanave të ngjarjes dhe përcaktimin e shkakut të humbjes së jetës.