Ky është momenti kur Armand Shakaj hyn dhe del në një ambient në zonën e “5 Majit” në kryeqytet, ku dyshohet se ka marrë peng 34-vjeçarin Eglant Koçi, i cili rezulton i zhdukur prej 4 qershorit dhe më pas largohet me një motomjet. Gazetarja Flutura Tota ka siguruar për RTSH pamjet nga kamerat e sigurisë, në të cilat shfaqet Shakaj, i dyshuar si autori kryesor i rrëmbimit dhe zhdukjes së 34-vjeçarit Koçi.

Shakaj hyn në këmbë dhe më pas largohet me motomjetin e Eglant Koçit.

Një ditë parë policia njoftoi se ka arritur të gjejë motorin e 34-vjeçarit të zhdukur dhe vendin ku ai është mbajtur.

Eglant Koçi është zhdukur më 4 qershor, dhe për herë të fundit është parë në zonën pranë sheshit “Wilson” në kryeqytet, teksa po lëvizte me motorin e tij me targa “CT969”. Policia ka arritur të gjejë nga kamerat e sigurisë edhe disa episode të lëvizjes së tij me motor nëpër Tiranë.

Koçi nuk rezulton me precedent penal, dhe mbetet i paqartë konflikti. Ai rezultonte i punësuar në një biznes mobilierie, por dyshohet se mund të jetë përfshirë në tregti të kriptovalutave, një prej pistave ku po hetohet.

Ndërkohë policia ka arrestuar Enea Zyferin, kamerierin e lokalit në pronësi të Armand Shakajt. Zyferi u arrestua nga policia e Tiranës për përkrahje të autorit të krimit. Ky i fundit në sallën e gjyqit këtë të mërkurë ka mohuar të ketë lidhje me ngjarjen, teksa gjykata e la në burg.

Prokurori i çështjes kërkoi që 25-vjeçari të lihej në qeli për një afat të pacaktuar, deri në kryerjen e plotë të hetimeve dhe deri sa të zbardhet e gjithë dinamika e ngjarjes.

Eglant Koçi u denoncua i zhdukur nga familjarët, ndërsa ka dyshime se ai është rrëmbyer, është mbajtur peng dhe është vrarë.

Nga provat e grumbulluara deri më tani nga grupi hetimor, rrethanore dhe shkencore ka dyshime se 34-vjeçari mund të jetë vrarë dhe me pas trupi të jetë zhdukur.