Kryeministri Edi Rama në podcastin e tij diskutoi projektin e rijetëzimit të Bulevardit historik “Epidamn” në Durrës, duke theksuar se ai është një iniciativë strategjike për zhvillimin e qytetit të vjetër mesdhetar dhe promovimin e Shqipërisë si destinacion turistik.

Rama nënvizoi se zona arkeologjike A, ku do të realizohet projekti, përfshin monumente të rëndësishme si Amfiteatri Romak, Forumi Bizantin dhe Termat Romake, të cilat nuk janë thjesht trashëgimi kombëtare, por pjesë e trashëgimisë botërore. Objektivi për përfshirjen e kësaj zone në Listën e Trashëgimisë Botërore të UNESCO-s e bën projektin një detyrim ndërkombëtar.

“Projekti i rijetëzimit të zemrës historike të Durrësit po shoqërohet me keqinterpretime dhe keqinformime që nuk kanë të sosur, ndërkohë që realizimi i tij është me natyrë strategjike për të ardhmen e qytetit të vjetër mesdhetar dhe të Shqipërisë Europiane si një destinacion i rëndësishëm turistik në Mesdhe.

Zona Arkeologjike A ku do të marrë jetë projekti, nuk është një hapësirë e zakonshme urbane dhe çdo debat pronash mbi atë zonë nuk duhet të dalë nga korniza e faktit themelor: Ajo zonë është pronë e thesarit të trashëgimisë sonë kombëtare dhe pjesë e trashëgimisë botërore. Amfiteatri Romak, Forumi Bizantin, Termat Romake janë monumente të qytetërimit europian, jo thjesht monumente të regjistrit tonë kombëtar të trashëgimisë. Objektivi për hyrjen e kësaj zone në Listën e Trashëgimisë Botërore të UNESCO-s e çon këtë projekt përtej dimensionit kombëtar. E bën një detyrim ndërkombëtar.

Ky projekt nuk ka lindur sot as ka marrë formë në errësirë, po është mbështetur mbi një program të kahershëm të kësaj qeverie për atë zonë, si edhe një Plan të Menaxhimit të Integruar, hartuar nga Ministria e Kulturës dhe hedhur në konsultim publik në vitin 2022. Ligji për Trashëgiminë Kulturore e detyron shtetin të ndërhyjë kundër degradimit apo ndërtimeve informale në zonat e trashëgimisë kulturore. Pikërisht këtë ne po bëjmë”, u shpreh Rama.

Ai theksoi se shpronësimet janë të domosdoshme për ruajtjen e trashëgimisë, duke sjellë shembuj historikë nga Roma dhe Athina, ku mijëra prona u shpronësuan për hapësira publike dhe parqe arkeologjike.

“Historia ndërkombëtare tregon se asnjë vend nuk ka zbuluar, nuk ka konservuar dhe nxjerrë në pah trashëgimi të këtyre përmasave pa ndërmarrë shpronësime. Në Romë, mijëra e mijëra prona u shpronësuan për hapjen e Forumeve Imperiale. Në Athinë, u realizuan shpronësime masive për zonën përreth Akropolit dhe krijimin e parkut arkeologjik. Ne do të bëjmë pikërisht këtë, me ndjeshmëri e me drejtësi ndaj banorëve, po me vendosmëri ndaj interesit kombëtar”, tha ai.

/rtsh.al/